اسلام آباد۔ 11 جنوری (اے پی پی) بنجائی وزیر خزانہ و محصولات سینیٹر محمد اسحاق ڈار کمرشل بینک آتیٹی ساڑی زرمبادلہ اسکان حکومتی رسینگ نا بے بنداو و ناپاک پروپیگنڈا ءِ سختی اٹ مسترد کرسا پارینے کہ مستین اٹ ملک ءِ بھس کروک آ زموار آک ناپاک مسخت آتیکن داوڑنا پروپیگنڈا کننگ ءُ ہرافتے ٹی ہچ ءُ حقیقت اس اف۔ چارشنبےنادے آ تینا ٹویٹ آتیٹی وزیرخزانہ پارے کہ اسٹیٹ بینک و کمرشل بینک آتون ساڑی زرمبادلہ مدام زرمبادلہ نا کوڑی تا بشخ مریک، ساڑی ٹی ، ای ہندا اصول نا رداٹ زرمبادلہ نا حساب وکتاب نا حوالہ ءِ تسوسٹ۔ وزیرخزانہ پارے کہ گڑاس مفاد پرست زموار ، ہرافک مستین اٹ دا ملک ءِ بھس کریسر، اودے غلط ءِ رنگ اس ترسا اسہ مہم اسے نا بناءِ کریر کہ دُن کہ حکومت کمرشل بینک آتون ساڑی زرمبادلہ نا کوڑی تسکان رسینگ آ سجفنگ ءِ ہرا حقیقت اٹ شاری تا ملکیت ءِ۔ وزیرخزانہ دا بے بنداو و برخلاف حقیقت مہم نا سختی اٹ تردید ءِ کرے و وضاحت کرے کہ حکومت داوڑنا اسہ گام اسے آہم سجفپننگ ءِ۔ وزیرخزانہ پارے کہ شاری تے دا ناپاک، بے بنداو و برخلاف حقائق پروپیگنڈا تے بایدے گوجالے۔ وزیرخزانہ پارے کہ انشاء اللہ آخبت خڑک اٹی پاکستان نا زرمبادلہ نا کوڑی تیٹی گچینی بریک۔
