اسلام آباد۔ 11 جنوری (اے پی پی) بنجائی وزیر بین الصوبائی رابطہ (آئی پی سی ) احسان الرحمان مزاری تون پاکستان اٹی ارجنٹائن نا سفیر لیو پولڈوفرانسسکو سورس اسلام آباد اٹی اوڑدہی کرے ہراٹی بنجائی وزیر فٹبال ورلڈ کپ اٹی ارجنٹائن نا سرسہبی آ سفیر ءِ مبارکبادی تس۔ بنجائی وزیر پارے کہ ہڑتوم آ ملک آتا نیام اٹ گوازی خاص وڑاٹ فٹ بال ، پولو، سکواش و کوہ پیمائی نا بشخ آتیٹی کمکاری نا بھلو گنجائشت اسے۔ اومستی پارے کہ پاکستان ورناتا بھلو کچ اسے آ تالان ملک ءِ، و گوازی تا پڑاٹی ورناتا لائخی تے مون آ دننگ کن بھلو زرکاری اس مننگ کیک۔ بنجائی وزیر دا است خواہی نا درشانی ءِ کرے کہ پاکستان فٹ بال نا کوچنگ و تربیت اٹی ارجنٹائن نا انمول آزموندہ و مہارت آن بھاز ہیل کننگ کیک۔ آئی پی سی نا بنجائی وزیر پاکستان نا زالبول فٹ بال گوازی گرآتیکن فٹ بال کوچنگ و تربیت نا گمان تا بارواٹی ہم ہیت کرے۔ سفیر پارے کہ دا چرجوئی ٹی او وزیراعظم نا خصوصی کمکار یوتھ افیئر ز پاکستان تون سرجمی اٹ گپ وتران کرے و ہڑتوم آ کنڈآتا کمکاری نا بابت بھاز انگا باندات آتیا گپ وتران کننگا ہرافتے ٹی خاص وڑاٹ ورناتیا چکار کننگانے ۔ سفیر تینا است خواہی نا درشانی ءِ کرے کہ ارجنٹائن نا حکومت پاکستان تون خاص وڑاٹ گوازی تا بشخ اٹی مریس مدتی رابطہ غاتا خواہندار ءِ۔ اوداسال انا بناٹی ارجنٹائن نا زالبول فٹ بال گوازی گرآتا گمانی دورہ ءِ پاکستان نا بارواٹی ہم ہیت کرے، تانکہ پاکستان اٹی زالبول فٹ بال گوازی گر آتا تربیت و کوچنگ ءِ کننگ مرے۔ اونا مستی پاننگ ئس کہ کوئٹہ غان تعلق تخوک آ پاکستانی زالبول فٹبال گوازی گرآتیٹی دا گوازی کن بھاز جوان ءُ ٹیلنٹ اسے۔ اوڑدہی ٹی تین پہ تینی وڑاٹ سلاہ تننگا کہ ہڑتوم آ ملک آتا ہڑتوم آ کنڈآتا تعلقداری نا شونداری کن گوازی تا چاہندار آتا ہن و بر آ اواری اٹ کاریم کننگ کیرہ و گوازی گرآتیٹی نشئی آ دوائی تا کاریم اٹ اتنگ(ڈوپنگ) نا لعنت نا برخلاف ہم اواری اٹ جہد کننگ کیرہ۔
