اسلام آباد۔ 11 جنوری (اے پی پی) پاکستان اٹی سعودی عرب نا سفیر نواف سعید المالکی پارینے کہ پاکستان و سعودی عرب نا نیام اٹ بروک آ دے تیٹی سعودی ڈویلپمنٹ فنڈ انا کمک اٹ اسہ ارب ڈالر آن زیات نا معاہدہ غا دستخط مریک۔ دا ہیت ءِ او سعودی ٹی وی چینل “الاخباریہ ” تون گپ وتران کرسا پارے۔ نواف سعید المالکی پارے کہ پاکستان 1947ء ٹی ہراتم جوڑ مس تو سعودی عرب ہمو اولیکو ملک آتیٹی اوار ئسک ہرا پاکستان ءِ امنا کریر و کمک فراوان کریر۔ اوپارے کہ سعودی عرب نا بانی آن ہلیس خادم الحرمین الشریفین سلمان بن عبدالعزیز و ولی عہد محمد بن سلمان اسکان سعودی حکومت مدام پاکستان تون تفینے و اقتصادی و مالی کمک کرینے۔ اوپارے کہ سعودی عرب و پاکستان ناتعلقداریک بے مٹ ءُ و غٹ بشخ آتیٹی ودوک آ تعلقداریک ءُ، ساڑی ٹی سعودی عرب نا کنڈآن پاکستان اٹی زرکاری ءِ 10 ارب ڈالر اسکان ودفنگ نا جاچ ءِ ہلنگ نا پڑو کننگا۔ داکان بیدس سعودی ڈیپازٹ ءِ ہم ودفنگ نا جاچ ءِ ہلنگ نا پارت کننگانے۔ اوپارے کہ بروک آ دے تیٹی سعودی ڈویلپمنٹ فنڈ انا کمک اٹ پاکستان و سعودی عرب نا نیام اٹ تیل انا بشخ اٹی اسہ ارب ڈالر آن زیات نا معاہدہ غا دستخط مریک ۔ اوپارے کہ دا گام گیج آک سعودی عرب و پاکستان نا نیام اٹ سوگو تذویراتی شریداری نا ڈیک ءِ ایترہ۔
