جنیوا۔ 10 جنوری (اے پی پی) وزیراعظم محمد شہباز شریف ریزیلیئنٹ پاکستان کانفرنس نا سرسہبی آ منت واری ءِ درشانی ءِ کرسا پارینے کہ 9 ارب ڈالر آن زیات زر نوکاپ آن زہمی تا بحالی و پوسکن تفنگ کن غیبی کمک اسے آن کم افس، اللہ نا کمک و السی کمک اٹ پاکستان نا کنڈا بروک ہر مشکل نا جیرت و دانائی اٹ مقابلہ ءِ کینہ۔ سے شنبے نادے آ وزیراعظم آفس نا میڈیا ونگ آن جاری بیان نا رداٹ وزیراعظم شہباز شریف پارے کہ اللہ تعالیٰ نا شکر ءِ ہراپاکستان ومصیبت نا خلوک الس کن گچینی نا کسر اس ملا۔ اوپارے کہ 9 ارب ڈالر آن زیات زر نوکاپ آن زہمی و پاکستان نا بحالی ٹی غیبی کمک آن کم اف۔ داخہ بھلو زراسے نا پاکستان ءِ ملنگ ساڑی سیوتی حکومت آ دنیا نا پت انا درشانی ءِ۔ دا اکائی و بیست ءُ دو کروڑ الس نا سیوت نا سرسہبی ءِ، داپاکستان نا ٹیم ورک انا سرسہبی ءِ۔ وزیراعظم پارے کہ بنجا و اکائی تا ہندا ٹیم ورک و قومی جوزہ غان پاکستان و الس ءِ مشکل آتا مین آن کشنہ۔ داامانت ءِ دیانتداری ، شفافیت و تھرڈ پارٹی آڈٹ آن حقدار اسکان سرکینہ۔ غٹ جہانی پارٹنرز خاص وڑاٹ سیکرٹری جنرل اقوام متحدہ نا است انا حب اٹ منت اوار اُٹ۔ مدام مہروان ایلم سعودی عرب، عظیم سنگت چین، برادر ملک ترکیہ نا سرکڑدہ غاتا منت وار اُن۔ اوپارے کہ ولی عہد و سعودی عرب نا وزیراعظم عزت مآب شہزادہ محمد بن سلمان نا خصوصی منت واری ءِ ہرفیوہ ہرا کانفرنس آن بیدس پاکستان نا مالی کمکاری نا فراخ دلانہ و برادرانہ گام ہرفینے۔ پاکستان نا عظیم برادر ملک متحدہ عرب امارات و قطر انا سرکڑدہ غاتا خاص وڑاٹ منت واری ءِ ہرفنہ۔ یورپی یونین، امریکہ، جرمنی، جاپان ، فرانس تون اوار کانفرنس اٹی ساڑی غٹ ملک آتا سرکڑدہ غاتا منت واری ءِ ہرفنہ۔ جہانی مالیاتی ادارہ غاتا منت وار ہرافک 3 کروڑ 30 لکھ نوکاپ آن زہمی تا مشکل آتے پہہ مسر۔ وزیراعظم پارے کہ اسلامی شونداری بینک، ورلڈ بینک، اے ڈی بی، یوایس ایڈ، ڈیفیڈ و ایلو ادارہ غاتا منت واری ءِ ہرفیوہ۔ بلاول بھٹو زرداری نا کماشی ٹی وزارت خارجہ کانفرنس نا مسخت آتا دوئی کننگ اٹ بھاز متحرک و سفت نا قابل کڑد ادا کرے۔ وزیرخزانہ اسحاق ڈار کانفرنس ءِ پاکستان ءِ مون تروک مالی مشکل آتیان معلومدار کننگ، نوکاپ آن زہمی تا بحالی کن درکار وسیلہ غاتا فراوانی و جہانی مالیاتی ادارہ غاتے قائل کننگ اٹ اہم ءُ کڑد اس ادا کرے۔ اوپارے کہ احسن اقبال نا صوبہ غاتا سلابت اٹ ہلہلہ ئی بنداو تیا جوان دستاویز تیار کرے ہرانا سوب آن دا زر پاکستان ءِ ملنگ ممکن مننگ کرے، دا دستاویز اٹی نسخان وبحالی کن آخبت نا خاکہ ءِ تننگانے۔ احسن اقبال ، شیری رحمان، سردار ایاز صادق، حنا ربانی کھر و مریم اورنگزیب ءِ اوفتا گچین کوشست آتیا شاباشی ایتیوہ۔ جنیوا کانفرنس نا سرسہبی کن غٹ تعلقدار وزارت و محکمہ غاتا ستاءِ کیوہ۔ نم غٹ ’’تیم پاکستان ‘ مرسا پاکستان کن سرسہبی دوئی کریرے، نمے آ غٹ آ گمر ءِ۔ الحمداللہ، پاکستان مشکل آتیان پیش تمنگ ءِ۔ اللہ تعالیٰ نا کمک و الس نا کمک اٹ پاکستان نا کنڈا بروک آ ہر مشکل نا جیرت و دانائی اٹ مقابلہ ءِ کینہ۔
