جنیوا۔ 10 جنوری (اے پی پی) وزیراعظم محمد شہباز شریف پارینے کہ ریزیلیئنٹ پاکستان جہانی کانفرنس نا سرسہبی آ پاکستان نا ٹیم ءِ مبارکبادی ایتنہ، دنیا نا کنڈآن 9 ارب ڈالر نا پڑو تاریخی ءُ سرسہبی اسے ہرا نما ایمانداری و لگن آن تینا مسخت آتا دوئی کننگ کن کوشست آتا بھرم ءِ، دا دے پاکستان نا حکومت و 22 کروڑ الس کن تاریخی ءُ اہمیت اس تخک، جنیوا کانفرنس اٹی جہانی برادری پاکستان تون پبی یکجہتی نا درشانی ءِ کرے ، جنیوا کانفرنس اٹی شریک ڈل انا غٹ باسک آک و سفارتی مشن نا خواری نا سوب آن دنیا ننتون سلیس، دا پڑو و قول آتے عملی دروشم اس تننگ نا ریسہ اہم ءِ، داڑکن تکنیکی کمکاری و غٹ وسیلہ غاتے کاریم اٹ اتنگک، ہندا جوزہ اٹ پاکستان ءِ مشکل آتیان کشنہ۔ سے شنبے نادے آ وزیراعظم محمد شہباز شریف جنیوا ٹی پاکستانی ڈل انا باسک و آفیسر آتون گپ وتران کرسا پارے کہ ڈل اتون بروک آ باسک آک یا داڑے خذمت سرتروک آ غٹ آفیسر آتے مبارکبادی ایتنہ و اوفتا منت واری ءِ ہرفنہ کہ داکان جوان ءُ ٹیم اس پاکستان نا درور ءِ پٹنگ شاید مشکل ءِ، نم غٹ بھاز لگن، خواری و مسخت ءِ مون آتخسا غٹ ریسہ غاتے طے کریرے، نن جوان چانہ کہ ہراوڑ دا کانفرنس نا بابت پیپر ورک ءِ پورو کننگا، ہراوڑ دانا بست وبند آتیٹی ویل بروئے و اوفتے بھلو خندہ پیشانی اسے تون ایسر کرورے۔ اوپارے کہ گڑاس وخت ہندن محسوس مسکہ کہ دُن مف کہ ننے سبکی مروئے ولے اللہ نا شکر ءِ کہ دے و نن خواری نا بھرم تدوک آ کانفرنس اٹی مون آ بس و دنیا خنا کہ 9 ارب ڈالر نا پڑو کننگا، دااسہ تاریخی ءُ سرسہبی اسے، دا نما ایمانداری اٹ تینا مسخت آتا دوئی کننگ کن کوشست آتا بھرم ءِ و دانما خواری، نما پاکستان تون اخلاص نا شاہدی ءِ، تدوک آ دے نئے بیرہ پاکستان ناحکومت بلکن 22 کروڑ الس کن تاریخی ءُ دے اس ئسک کہ ہراوڑ پاکستان نا تیم تینا الس نا گچینی و ویل آتا ایسری کن دا کاز ءِ پورو کرے۔ وزیراعظم پارے کہ نن صوبہ غاتا ہم است بڈی ءِ کرین و اوفتے پارین کہ او داکانفرنس اٹی ننتون بریر و ہموڑے دنیا نا مون آ تینا کیس ءِ تخر، ہندا وڑ دنیا ہموڑے اسہ سیوت و قومی یکجہتی اسے خنا، دا سرسہبی نا سہرا درجہ بدرجہ نما غٹ انا کاٹم آٹے، وزیر خارجہ بلاول بھٹو زرداری و اونا ٹیم پبی زمواری تے پورو کرے، وزارت خارجہ دنیا ءِ نوکاپ آن زہمی تا کنڈآ چکار کرفنگ اٹ اہم ءُ کڑد اس ادا کرے، وزیرخزانہ اسحاق ڈار، وزیر اقتصادی امور سردار ایاز صادق ، وزیر ڈٹ بندی و شونداری احسن اقبال ، وزیر چاگڑدی بدلی شیری رحمان و وزیرحوالکاری و شینکاری مریم اورنگزیب پبی کوشست کریر، وزیر حوالکاری دنیا نا اسکرین تیا نما غٹ انا کوشست آتے تالان کرے، وزیر مملکت خارجہ امور بھاز خواری اٹ کاریم کرے، سیکرٹری خارجہ، سفیر و ایلو سفارتکار آک غٹ دے ونن خواری کریر، نما غٹ انا پاکستان نا الس و حکومت نا کنڈآن است انا حب اٹ منت واری ءِ ہرفیوہ۔ اوپارے کہ اصل چیلنج دا پڑو و قول آتے عملی دروشم اس تننگ ءِ، دا ڈٹ آتے عملی دروشم اس تننگ کن ننے تینا کاریم نا کچ ءِ ودفوئی ءِ، تینا تکنیکی مہارت آتے کاریم اٹ اتوئی ءِ و داڑکن ہرا تکنیکی کمک درکار مریک او فراون کننگک تانکہ دا پڑو و قول آتے گڈیکو دروشم اس تننگ مرے، دا ریسہ بھاز اہم ءِ۔ اوپارے کہ گڑاس ملک آتا کنڈآن پڑوننکن بھاز حیرانی اس ئسک، اوفتا بھاز منت وار اُن، اللہ نا کمک اٹ دا باندات آک مون آ کار، ڈل انا باسک و آفیسر آک تینا غٹ لائخی و قابلیت ءِ کاریم اٹ اتسا دامشکل ٹاسک ءِ دوئی کریر۔
