واشنگٹن۔ 10 جنوری (اے پی پی) امریکہ پارینے کہ پاکستان اٹی نوکاپ آن زہمی علاقہ غاتا بحالی و پوسکن تفنگ کن پین 10 کروڑ ڈالر نا امداد تننگ انگ ءِ، ہند اوڑ کل فنڈنگ 200 ملین ڈالر مریک۔ امریکی محکمہ خارجہ نا ترجمان نیڈپرائس پریس حوال اٹی پارے کہ پاکستان اٹی تدوک آ سال انا بھسکار نوکاپ آن پد آن امریکی حکومت پاکستانی انتظامیہ تون اواری اٹ بحالی ٹی کمکاری، فوڈ سیکورٹی، آفت آتون مون تننگ نا تیاری و کچ اٹی ودکی آ کاریم کننگ اٹی ءِ۔ اوپارے کہ اودے داپاننگ تون خوشی محسوس مننگ اٹی ءِ کہ بحالی و پوسکن تفنگ کن پین 100 ملین ڈالر نا پڑو کرسا امریکہ تینا کل امداد ءِ 200 ملین ڈالر اسکان سرکرینے۔ اوپارے کہ دا 100 ملین ڈالر ءِ نوکاپ آن بچفنگ، گورننس، ناجوڑی تا تالانی نا توننگ ، زرگزرانی شونداری و ساف توانائی، موسمی کشت وکشار، فوڈ سیکورٹی و انفراسٹرکچر نا پوسکن تفنگ آ خڑچ کننگک، دا فنڈنگ نا کمک اٹ کیمپ یا ایلو علاقہ غاتیٹی پناہ ہلوک آ نوکاپ آن زہمی تا بحالی ٹی ہم کمک کننگک۔ اوپارے کہ نوکاپ آن زہمی بندغ آتا بحالی و پوسکن تفنگ نا کوشست آتیٹی امریکی کمکاری برجاسلک و آخبت اٹی ہم ہموجاگہ نا الس کن موسمیاتی بدلی تتون مون تننگ اٹ کمک کننگک۔ ترجمان مستی پارے کہ پاکستان نا ہراڑے کہ اولیت مرے اوفتے ٹی امریکہ شریداری ءِ برجاتخک چائے او سیکورٹی، زرگزرانی ، یا نوکاپ زہمی تیکن انسانی امداد فراوان کننگ نا باندات مرے۔
