اسلام آباد۔ 10 جنوری (اے پی پی) نمائندہ خصوصی وزیراعظم پاکستان بین المذاہب ہم آہنگی و دے ٹک نیامی حافظ محمد طاہر محمود اشرفی پارینے کہ جنیوا کانفرنس اٹی 10 ارب ڈالر آن زیات پاکستان کن امداد نا پڑو و سعودی عرب نا ولی عہد نا کنڈآن پاکستان اٹی زرکاری کننگ و اِرا ارب ڈالر پاکستان نا ریزروٹی اوار کننگ نا بابت پڑو آک سفت نا قابل و پاکستان نا سیاسی و عسکری سرکڑدہ غاتیا جہانی برادری و سنگت اسلامی عرب ملک آتا پت انا درشانی ءِ۔ جہانی برادری و سنگت اسلامی ملک آک و مملکت سعودی عرب نا کنڈآن پاکستان تون کمکاری نا پڑو آتا ستاو منت واری ءِ ہرفنہ۔ داہیت ءِ چیئرمین پاکستان علماء کونسل حافظ محمد طاہر محمود اشرفی قومی و جہانی میڈیا تون گپ وتران کرسا پارے۔ حافظ محمد طاہر محمود اشرفی پارے کہ نوکاپ آن زہمی تا بابت وزیراعظم میاں شہباز شریف و اونا ٹیم انا جہانی برادری و سنگت عرب اسلامی ملک آتون رابطہ غاتا نتیجہ ٹی ہرا گام گیج آتا جنیوا و سعودی عرب اٹی پڑو ءِکننگانے، او پاکستان نا ہند و تعلقداری تے پاش کیک۔ دا بابت پاکستان نا سیاسی و عسکری سرکڑدہ غاتا کوشست ستاکڑزک و داہیت پیدوار ءِ کہ پاکستان اٹی بے چیٹی ودی کروک آ کوشست و پاکستان نا ڈیفالٹ کننگ نا افواہ سازی کروک آتے دا پڑوآن شکی مرور۔ اوپارے کہ جنیوا کانفرنس موسمیاتی بدلی تا اثرآتا دنیا ءِ احساس ترفے۔ کانفرنس موسمیاتی بدلی تا اجتماعی چیلنج نا اجتماعی وڑاٹ مقابلہ ءِ کننگ نا سوچ ءِ ایکشن اٹ بدل کرینے۔ کانفرنس انسانیت و کرہ ارض انا چاگڑدی گچینی ٹی اہم ءُ جہانی فورم اس جوڑ مریک۔ جہانی فورم آ پاکستان نا مخلوق نا مخ تفی ءِ کروک آ ملکی و درملکی بشخ ہلوک آتا ہم پرخلوص منت واری ءِ ہرفنہ۔ نوکاپ آن پد وزیراعظم شہباز شریف غٹ صوبہ و ادارہ غاتے اوار ہلسا ہراوڑ اجتماعی کوشست کرے ، دا اونا بھرم آک ءُ و سیوتی حکومت نا اسیجائی کوشست آتا جہانی کہول آ اعتراف ءِ۔ اوپارے کہ جنیو اکانفرنس پاکستان و نوکاپ آن زہمی تیکن بھلو سرسہبی اسے، سیکرٹری جنرل اقوام متحدہ، عرب اسلامی ملک و جہانی برادری نا منت واری ءِ ہرفنہ۔
