اسلام آباد۔ 10 جنوری (اے پی پی) بنجائی وزیر حوالکاری و شینکاری مریم اورنگزیب پارینے کہ جنیوا کانفرنس پاکستان و نوکاپ آن زہمی تیکن بھلو سرسہبی اسے، سیکرٹری جنرل اقوام متحدہ، جہانی برادری نا منت واری ءِ ہرفنہ، شفافیت اٹ فنڈ انا امانت ءِ الس اسکان سرکینہ، اوفتا زند اٹی بدلی اتینہ۔ سے شنبےنادے آ تینا بیان اٹی بنجائی وزیر حوالکاری مریم اورنگزیب پارے کہ انسانیت و موسمیاتی بدلی تا کاز ءِ گچین وڑاٹ تالان کننگ آ جہانی و ملکی میڈیا نا منت واری ءِ ہرفنہ۔ داکانفرنس انسانیت نا اجتماعی احساس نا علامت جوڑ مسنے۔ اوپارے کہ وسیلہ غاتا فراوانی آن نوکاپ آن زہمی تا پوسکن و گچین زند انا بناءِ کننگ اٹ کمک رسینگک۔ کانفرنس موسمیاتی بدلی تا سنگین اثرآتا دنیا ءِ احساس ترفے۔ اوپارے کہ کانفرنس موسمیاتی بدلی تا اجتماعی چیلنج نا اجتماعی وڑاٹ مقابلہ ءِ کننگ نا سوچ ءِ ایکشن اٹ بدل کرینے۔ کانفرنس انسانیت و کرہ ارض انا چاگڑدی گچینی ٹی اہم ءُ جہانی فورم اس جوڑ مریک۔ اوپارے کہ جہانی فورم آ پاکستان و غٹ صوبہ غاتا کیس ءِ پیش کننگ و اونا مخ تفی ءِ کروک آ ملکی و درملکی بشخ ہلوک آتا ہم پرخلوص منت واری ءِ ہرفنہ۔ نوکاپ نا بننگ تون وزیراعظم شہباز شریف غٹ صوبہ و ادارہ غاتے اوار ہلساہراوڑ اجتماعی کوشست کرے، دااوفتا بھرم ءِ۔ دا سیوتی حکومت نا اسیجائی کوشست آتا جہانی کہول آاعتراف ءِ۔
