اسلام آباد۔ 10 جنوری (اے پی پی) اسپیکر قومی اسمبلی راجہ پرویز اشرف جنیو اکانفرنس اٹی جہانی برادری نا کنڈآن نوکاپ زہمی تا بحالی کن پبی کمکاری نا ستاءِ کرسا جنیواکانفرنس نا سرسہب اڈتننگ آ وزیراعظم میاں شہباز شریف، وزیر خارجہ بلاول بھٹو زرداری و حکومت نا زرگزرانی و سفارتی ٹیم ءِ مبارکبادی تسنے۔ سے شنبےنادے آ تینا اسہ بیان اسے ٹی اوپارے کہ کانفرنس نا اڈتننگ پاکستان و نوکاپ زہمی تیکن بھلو سرسہبی اسے، جہانی برادری و سیکرٹری جنرل اقوام متحدہ انتونیوگوتریس نا منت وار اُن ، جہانی برادری نا کنڈآن نوکاپ زہمی تا بحالی کن امداد نوکاپ زہمی تا زند اٹی جوان ءُ بدلی اس اتیک۔ اسپیکر قومی اسمبلی پارے کہ کانفرنس چاگڑدی بدلی تا چیلنج آتے جہانی کہول آ تالان کننگ اٹ اہم ءُ پیش رفت اس جوڑ مریک، جنیوا کانفرنس نئے بیرہ پاکستان بلکن چاگڑدی بدلی تیان زہمی مروک آ ایلو ملک آک و کرہ ارض اناچاگڑدی گچینی ٹی فائدہ ئی مریک، چاگڑدی بدلی تا سوب آن پاکستان اٹی بروک آ نوکاپ آن بھلوکچ اسے آ جانی و مالی نسخان مس ، جہانی برادری نا کنڈآن نوکاپ زہمی تا بحالی کن کمکاری ستاکڑزک۔ اسپیکر جنیوا کانفرنس اٹی پاکستان نا مخ تفی ءِ کننگ و نوکاپ زہمی تا ویل آتے تالان کروک آ ملکی و درملکی بشخ ہلوک و چاگڑدی بدلی تا اثرآتے گچین وڑاٹ تالان کننگ آ میڈیا نا ہم منت واری ءِ ہرفے۔
