اسلام آباد۔ 10 جنوری (اے پی پی) حکومت ملکی زرگزران ءِ سوگو کننگ و مریس مدتی نمو کن اسہ پکا ءُ بنداو اس تخنگ اٹ سرسہبی دوئی کننگ اٹی ءِ ہراجہانی زرگزرانی درجہ بندی نا ادارہ جہانی برادری نا بحالی و پوسکن تفنگ نا سرجز آتیٹی پاکستان تون پبی یکجہتی نا درشانی آن ہم پک مسنے، جنیوا کانفرنس اٹی سنگت ملک و جہانی مالیاتی ادارہ غاک پاکستان اٹی نوکاپ آن پد پوسکن تفنگ و بحالی نا ڈٹ آتیکن 10 ارب 70 کروڑ ڈالر آن زیات امداد نا پڑو کرینو۔ اسلامی شونداری بینک 4 ارب 20 کروڑ ڈالر، ورلڈ بینک2 ارب ڈالر، ایشیائی شونداری بینک 1.5 ارب ڈالر، سعودی عرب اسہ ارب ڈالر، فرانس 34 کروڑ 50 لکھ ڈالر، چین و یوایس ایڈ نا 10، 10 کروڑ ڈالر، یورپی یونین 9 کروڑ 30 لکھ ڈالر، جرمنی 8 کروڑ 80 لکھ ڈالر، جاپان 7 کروڑ 70 لکھ ڈالر و آذربائیجان 20 لکھ ڈالر ایتک۔ سنگت ملک و جہانی شریدار آتا کنڈان امداد نا پڑو آن نوکاپ آن زہمی علاقہ غاتیٹی پوسکن تفنگ نا کاریم تیٹی ترندی بریک، وخت اس کہ ملک اٹی زرگزرانی سرجزآک ہم گچینی نا کنڈا ہِننگ اٹی ءُ۔ حکومت پاکستان جہانی ادائیگی تا حالیت ءِ گچین کرینے۔ مثبت گام گیج آتا سوب آن زرگزرانی حالیت آتیٹی گچینی نا آثار نمان ءِ۔ پاکستان اسہ بھلو زرگزران اسے، زرمبادلہ نا کوڑی تیٹی پدریسہ ودکی مریک، حکومتی پالیسی تیان محسوس مننگ اٹی ءِ کہ پاکستان نا ادائیگی تا حالیت آتیٹی پین گچینی بریک ۔ حکومت نا گام گیج آتا سوب آن پیشن نا اقتصادی خطرہ غاتیٹی کمتی بسنے۔ ساڑی حکومت نا وخت آ سخت زرگزرانی گام گیج آتیان ملک ءِ ڈیفالٹ مننگ آن بچفے۔ کرنٹ اکاؤنٹ نسخان اٹی کمتی، پالیسی فریم ورک و ایلو گام گیج آتا سوب آن پاکستان اٹی زرگزرانی حالیت آتیکن پیشن نا خطرہ غاتیٹی کمتی سلک ولے درملکی زرمبادلہ نا کوڑی تے ودنگ اٹی زرس وخت لگک۔ پالیسی گام گیج و ایلو سوب آتا بناآ ادائیگی تا توازن اٹی گچینی نا چرجوئی برجاسلنگ نا گمان ءِ، درآمد آتیٹی کمتی کرنٹ اکاؤنٹ نسخان ءِ کم تخنگ اٹ اہم ءُ کڑد اس ادا کیک۔ بجلی نا برجا ڈٹ آتا پوروی آن ہم درآمد آتیٹی کمتی بریک و بجلی نا پیدوار اٹی ڈیزل نا جاگہ غا کولا، قدرتی گیس انا کاریم اٹ اتنگ و پن بجلی نا پیدوار نا سوب آن پدریسہ تیل انا درآمد آک ہم کم مریرہ۔ ولے داسکان دا پاننگ مفک کہ بجلی نا نرخ ہم کم مریک یا آخا۔ چیلنج آک ساڑی ءُ، ولے حکومت سنبرینگوک ءِ، ایف بی آر گچین کارکڑد نا درشانی ءِ کرینے، ایف بی آر ریونیو ٹی 24 درسد ودکی نشان تسنے، دا آب اٹ گچینی نا کنڈا اسہ گام اسے۔
