ریاض۔ 10 جنوری (اے پی پی) سعودی عرب نا ولی عہد و وزیراعظم شہزادہ محمد بن سلمان پاکستان اٹی سعودی عرب نا زرکاری ءِ 10 ارب ڈالر اسکان ودفنگ و اسٹیٹ بینک اٹی بطور ڈیپازٹ تخوک آ زر ءِ 5 ارب ڈالر اسکان ودفنگ کن جاچ ہلنگ نا پارت کرینے۔ سعودی پریس ایجنسی نارپورٹ نا رداٹ شہزادہ محمد بن سلمان اسٹیٹ بینک آف پاکستان اٹی سعودی عرب نا کنڈان بطور ڈیپازٹ تخوک آ زر ءِ ہم 5 ارب ڈالر اسکان ودفنگ آ سجفنگ نا پارت کرینے۔ سعودی فرمانرواشاہ سلمان بن عبدالعزیز تدوک آ سال 25 اگست آ پاکستان اٹی اسہ ارب ڈالر نا زرکاری نا پرمان کریسس۔ شہزادہ محمد سلمان ہندا زرکاری ٹی ودکی کن جاچ نا پارت کرینے۔ تدوک آ سال 2 دسمبر آ سعودی عرب پاکستان نا مرکزی بینک اٹی تخوک آ 3 ارب ڈالر نا مد اٹی پین اسہ سال اسکان نا ودکی کریسس۔ اسٹیٹ بینک آف پاکستان نومبر 2021 اٹی سعودی ڈیویلپمنٹ فنڈ اتون اسہ معاہدہ سے آ دستخط کریسس، ہرانا رداٹ سعودی فنڈ 3 ارب ڈالر اسٹیٹ بین اٹی تخاسس۔ سعودی خبررساں ادارہ نا رداٹ زرکاری ٹی ودکی نا بابت جاچ انا دا پڑو ءِ ولی عہد شہزادہ محمد بن سلمان و وزیراعظم شہباز شریف نا نیام اٹ رابطہ غاتا رداٹ کننگانے۔ شہزادہ محمد بن سلمان پاکستان اٹی سعودی زرکاری ءِ ہم 10 ارب ڈالر اسکان ودفنگ کن جاچ ہلنگ نا پارت کرینے۔
