جنیوا۔ 09 جنوری (اے پی پی) بنجائی وزیر خزانہ و محصولات سینیٹر محمد اسحاق ڈار پارینے کہ نوکاپ آن زہمی لکھ آ پاکستانی و زہمی علاقہ غاتا پوسکن تفنگ و بحالی کن پاکستان ءِ جہانی برادری ، سنگت ملک، کثیر الجہتی و ہڑتوم آ کنڈآتا شریدار آتا کمکاری نا گرج ءِ، پاکستان تین اجہانی ادائیگی و زموارتیٹی سنبرینگوک ءِ، پاکستان چندی بشخ آتیٹی اصلاحات درستی راستی کرفنگ ءِ، بدترین نوکاپ پاکستان نا گرج آتے ودفینے وخت اس کہ ننتون مالی گنجائشت کم ءِ، پاکستان ءِ گونڈ و نیامی مد اکن مالی کمکاری و گنجائشت درکار ءِ۔ داخیال آتا درشانی ءِ وزیرخزانہ دوشنبےنادے آ سوئٹزر لینڈ نا شار جنیوا ٹی انٹرنیشنل کانفرنس آن کلائمیٹ ریزیلیئنٹ پاکستان نا اولیکو پلینری سیشن نا اسیجاکماشی ءِ کرسا کرے۔ وزیرخزانہ پارے کہ پاکستان چاگڑدی و موسمیاتی اثر، روس۔یوکرین جنگ، جہانی کساد بازاری و نیزگاری کون آ ویل آتون مہالوآن مون تسکہ، داحالیت آتا رداٹ ملک ءِ تاریخ نا بدترین نوکاپ تون مون تروئی تما، تدوک آ 30 سال اٹی اولیکو وار تدوک آ بشام اٹی 6 ہندا خہ زیات پِر مس ہراڑان مچ آ ملک خاص وڑاٹ سندھ و بلوچستان اٹی بھسکاری و نسخان مس، نوکاپ آن جم وڑاٹ مسہ کروڑ 30 لکھ آن زیات مخلوق زہمی مس، 1700 بندغ تینا جون تینا دوتے سلار، 13 ہزار ٹھپی مسر، 30 ہزار کلومیٹر سڑک و شاہراک بھس مسر، 440 پول بھس مسر، 500 ملین ایکڑ آ سلوک فصل آک بھس مسر، 2 ملین نا خڑک اُراعارضی و جزوی وڑاٹ زہمی مسر وخت اس کہ 10 لکھ ساہدار کسکر و بے گوامسر۔ وزیرخزانہ پارے کہ نوکاپ آن پدکیہی تُو دیر سلوک ئسک ہراڑان فصل آتے وخت آ دسنگ مننگ کتو و ننا کشت وکشار زہمی مس، سلوک دیر انا سوب آن اسکول و ہسپتال آک بند ئسر، ہندی وڑاٹ ہم رابطہ مشکل ئس، عارضی پناہ گاہ تیٹی مخلوق ءِ رہیفنگا وخت اس کہ ہسپتال آتا کاریم ہم عارضی وڑاٹ چلیفوئی تما ، نوکاپ آن 22 ہزار اسکول بند مسر ہراڑان لکھ آ چناتا تعلیم زہمی مس۔ اسحاق ڈار پارے کہ نوکاپ آن زہمی مخلوق نا کمک و پوسکن تفنگ و بحالی کن ننے مربوط کوشست آتا گرج ءِ، حکومت پاکستان زہمی مخلوق و علاقہ غاتا امداد و بحالی ءِ اولیت تس، بینظیر انکم سپورٹ پروگرام نا رداٹ دمدستی وڑاٹ 70 ارب روپئی نا ہلہلہ ئی کیش کمک فراوان کننگا، 8.17 ملین زہمی تے نغد امداد تننگا، 2.7 ملین خاہوت ءِ کیش ریلیف و ایلو المی امداد آتے تننگا و تننگ انگ ءِ۔ وزیرخزانہ جہانی بینک انا منت واری ءِ ہرفسا پارے کہ جہانی بینک نوکاپ آن زہمی تا بحالی و پوسکن تفنگ نا چرجوئی ٹی 1.6 ارب ڈالر نا کمکاری نا پڑو کرے وخت اس کہ 500 ملین ڈالر نا کمک کلائمیٹ ریزیلیئنٹ پاکستان کن فراوان کننگ نا قول کننگا۔ وزیر خزانہ پارے کہ پی ڈی ایم جہانی ادارہ غاتا کمک ات ہرا کساس ءِ خلکنے اونا رداٹ نوکاپ آن 30 ارب ڈالرآن زیات نا نسخان مسنے وخت اس کہ پوسکن تفنگ و بحالی کن پاکستان ءِ 16.3 ارب ڈالر نا گرج ءِ پاکستان ہڑتوم آ کنڈآتا و کثیر الجہتی شریدار آتا کمک اٹ بروک آ مسہ سال انا ڈٹ بندی کننگ ءِ، دافتیان نیمہ وسیلہ پاکستان تینا مالیاتی نظام نا کمک اٹ پورو کننگ نا کوشست کیک ، بروک آ مسہ سال اٹی ننے 8 ارب ڈالر سالانہ نا گرج مریک، سنگت ملک آک کثیر الجہتی و ہڑتوم آکنڈآتا شریدارآتا مخ تفی آن نئے بیرہ پوسکن تفنگ و بحالی نا کوشست آتے فائدہ مریک بلکن پاکستان کن ہموخہ مالی گنجائشت ہم پیش تمک ہراڑان پاکستان تینا پیشن نا ادائیگی و ایلو جہانی زمواری تے جوان وڑاٹ پورو کننگ نا قابل مریک۔ وزیرخزانہ پارے کہ چاگڑدی و موسمیاتی بدلی تا نتیجہ ٹی پاکستان آ مضر اثر تمانے، چاگڑد ءِ نسخان تروک آ گیس آتا پیش تمنگ اٹ پاکستان نا بشخ اسہ درسد آن ہم کم ءِ ولے تدوک آ نوکاپ آنبار چاگڑدی بدلی تیان زہمی ملک آتیٹی پاکستان سرفہرست ءِ، دا حالیت و توانائی و کنوئی آ گڑاتا جہانی نہاد آتیٹی ودکی نا رداٹ راجی سوگوی پاکستان کن اسہ گڑتی اسے۔ وزیرخزانہ پیدوار کرے کہ پاکستان تینا جہانی ادائیگی و زموار تیٹی سنبرینگوک ء،، پاکستان چندی بشخ آتیٹی اصلاحات دراستی راستی کرفنگ ءِ ، داڑتون اوار اوار محصولات آتیٹی ودکی و راجی بشخ آ خڑچ آتیٹی ودکی مننگ ءِ ولے ساڑی آ بدترین نوکاپ پاکستان نا گرج آتے ودفینے وخت اس کہ ننتون مالی گنجائشت کم ءِ ، دا حالیت آتا رداٹ پاکستان ءِ جہانی کمکاری نا گرج ءِ ، ننے گونڈ و نیامی مد اکن مالی کمک و گنجائشت درکار ءِ ، ننے اومیت ءِ کہ جہانی برادری ، سنگت ملک و ہڑتوم آ کنڈآتا و کثیر الجہتی شریدار دا مشکل ریسہ ٹی ننتون تفرہ۔ وزیرخزان پارے کہ نوکاپ آن زہمی مخلوق نا بحالی و امداد ننا دمدستی گرج ءِ ولے ننے دا 33 ملین زہمی مخلوق ءِ ہم مون آ تخوئی ءِ، داحالیت آتیٹی ڈیٹ سواپ و ایلو مالیاتی گام گیج آتا کمک اٹ لکھ آ نوکاپ زہمی تا امداد نا نیک مسخت ءِ مون آ دننگ مسنے۔ وزیرخزانہ جہانی برادری نا مخ تفی آ منت واری ءِ ہرفے۔ اوپارے کہ ریزیلیئنٹ ریکوری سٹریٹجک اٹی ہڑتوم آکنڈآتا اسٹریٹجک اٹی ہڑتوم آ کنڈآتا شریدار، سنگت ملک، این جی او و سول سوسائٹی نا تنظیم تا مخ تفی آ ہم پاکستان او غٹ انا منت وار ءِ۔ بنجائی وزیر ڈٹ بندی ، شونداری و خصوصی گام گیج پروفیسر احسن اقبال پلانری آن تران کرسا بشخ ہلوک آتے ساڑی آ بدترین نوکاپ آن مروک آ نسخان تیا سرجمی اٹ حوال تس و پارے کہ 2022 ء ٹی پاکستان اٹی اسہ بدترین ءُ نوکاپ اس بس ہراڑان 33 ملین بندغ آتے نسخان رسینگا۔ اوپارے کہ بلوچستان و سندھ انا 20 پسماندہ ضلع غاتے نسخان رسینگا، داڑتون پنجاب، خیبرپختونخوا نا گڑاس ضلع غاتے ہم نسخان مس۔ بنجائی وزیر اقتصادی امور سردار ایاز صادق پارے کہ وزارت اکنامک افیئر ڈویژن غٹ شریدار آتون اواری اٹ نوکاپ زہمی تیکن اولیتی بنداو تیا گام گیج کننگ ءِ۔ اوپارے کہ وزیراعظم شہباز شریف نا کماشی ٹی نوکاپ آن زہمی تے امداد تننگ انگ ءِ و اونا مانیٹرنگ ءِ ہم کننگ انگ ءِ۔ اوپارے کہ ای ہمو غٹ شریدار آتا منت واری ءِ ہرفیوہ کہ مشکل نا داساہت اٹی او پاکستانی الس تون تفنگ اٹی ءُ۔ پلانری آن تران کرسا جہانی بینک انا صدر مارٹن ریزر پارے کہ 2022 ء نا نوکاپ بھلو واقعہ اس ئسک ہرانا او تینٹ مشاہدہ ءِ کرے، پاکستان نا حکومت و ادارہ غاک نوکاپ زہمی تا بحالی کن وخت آ گام گیج کریر، جہانی بینک ایشیائی شونداری بینک ، یورپی یونین و اقوام متحدہ تون واری اٹ نوکاپ زہمی تا بحالی و پوسکن تفنگ کن حکمت عملی اس متعین کریر۔ اوپارے کہ حکومتی و ادارہ جاتی شفافیت نا کمک اٹ پوسکن تفنگ و بھالی نا سفر ءِ سرسہب کننگ اٹ کمک رسینگک۔ اوپارے کہ داہیت ستاکڑزک کہ ساڑی آ نوکاپ آن پد صوبہ غاتا زہمی علاقہ غاتیٹی پوسکن تفنگ و بحالی نا چندی ڈٹ آتا بنامسنے، نوکاپ زہمی تا امداد و زہمی علاقہ غاتا بحالی کن پاکستان نا حکومت نا عزم سفت نا قابل ءِ۔ داکان مست اقوام متحدہ نا شونداری ادارہ یواین ڈی پی نا ایڈمنسٹریٹر ایکم سٹیز تیناتران اٹی پارے کہ کورونا غان پد نوکاپ آن پاکستان زرگزرانی وڑاٹ سُرا، ہراڑان لکھ آ زندزہمی مس۔ اوکانفرنس اٹی شریک غٹ بشخ ہلوک آتے پارے کہ او ہرلحاظ اٹ پاکستان ءِ کمک فراوان کیر، نن داوخت آ جتا دور اٹی زندہ اُن۔ اوپارے کہ منہ تُو مست پاکستان ءِ تاریخ نا بدترین نوکاپ تون مون تروئی تما، پاکستان موسمیاتی بھسکاری نا مون اٹ بروک آ 8 ملک آتیٹی اوار ءِ۔
