جنیوا۔ 09 جنوری (اے پی پی) وزیرخارجہ بلاول بھٹو زرداری پارینے کہ پاکستان اٹی نوکاپ آن بھسکاری تا کچ بھاز زیات ءِ، نوکاپ نا پنچ تُو آن پد ہم چندی علاقہ غاک نوکاپ نا دیر اٹی ڈبنگوک ءُ۔ داخیال آتا درشانی ءِ او دوشنبے نادے آ جنیوا ٹی انٹرنیشنل کانفرنس آن ریزیلیئنٹ پاکستان نا بنائی سیشن آن تران کرسا کرے۔ وزیرخارجہ پارے کہ پاکستان نا گیشتر علاقہ داسکان نوکاپ نا دیر اٹی ڈبینگوک ءُ، نوکاپ آن 3 کروڑ 30 لکھ بندغ زہمی مسنو، است ہسون نوکاپ آن زہمی علاقہ غاتیٹی پوسکن تفنگ کن گام گیج داسکان برجاءِ۔ اوپارے کہ پاکستان اٹی ہر ہفت آن اسہ بندغ اس نوکاپ آن زہمی مسنے۔ بلاول بھٹو زرداری جہانی کانفرنس نا بشخ ہلوک آتے بخیر اٹ پارسا پارے کہ مشکل وخت اٹی پاکستان نا کمک ءِ کروک آملک آتا منت واری ءِ ہرفیوہ۔ وزیرخارجہ پارے کہ اینو اقوام عالم پاکستان تون یکجہتی نا درشانی ءِ کننگ کن یکجا مسنو، آخبت قدرتی آفت آتیان بچنگ کن پاکستان اسہ فریم ورک اس جوڑ کرینے۔ وزیراعظم محمد شہباز شریف و اقوام متحدہ نا سیکرٹری جنرل انتونیوگوتریس جنیوا ٹی مروک آ کانفرنس نا مہمانداری ءِ کننگ ءُ۔ داکان مست وزیرخارجہ بلاول بھٹو زرداری تینا تران اٹی پاکستان اٹی چاگڑدی بدلی آن مروک آ بھسکاری آن پد ملک انا پوسکن تفنگ نا بابت کانفرنس اٹی شریک ملک و جہانی ادارہ غاتا نمائندہ غاتا ستاءِ کرے۔ وزیراعظم محمد شہباز شریف و اقوام متحدہ نا سیکرٹری جنرل انتونیوگوتریس آن بیدس پاکستان اٹی اقوام متحدہ نا ریزیڈنٹ کوآرڈنیٹر جولین ہارنیس ہم جہانی کانفرنس نا بنائی سیشن آن تران کرے۔
