جنیوا ۔ 09 جنوری (اے پی پی) اقوام متحدہ نا سیکرٹری جنرل انتونیوگوتریس پارینے کہ بھسکار نوکاپ آن پاکستان نا بھلو بشخ اسے نسخان رسینگانے، انفراسٹرکچر نا بحالی کن بھلو کچ اسے آ گام گیج آتا گرج ءِ، پاکستان ءِ مسہ سال انا مد اٹی 16.3 ارب ڈالر نا امداد درکارمریک۔ اقوام متحدہ نا سیکرٹری جنرل داہیت ءِ دوشنبےنادے آ جنیوا ٹی پاکستان نا پوسکن تفنگ و بحالی ٹی شریدار ی نا سرحال آ مروک آ جہانی کانفرنس نا بنائی سیشن آن تران اٹی پارے۔ اوپارے کہ کانفرنس نا کمک اٹ کیش ، ٹرانسفر و ایلو وڑوڈول آتے اٹ کمک ءِ کننگ مریک، پاکستان اٹی نوکاپ آن مروک آ بھسکاری نا تینٹ ہنسا مشاہدہ ءِ کریٹ، ساڑی آ نوکاپ آن پاکستان نا بھلو بشخ اس زہمی مسنے۔ اقوام متحدہ نا سیکرٹری جنرل انتونیوگوتریس پارے کہ پاکستان اٹی نوکاپ آن مروک آ بھسکاری نا ندارہ ءِ تینٹ خنسا است پنا، نوکاپ آن 80 لکھ نا خڑک مخلوق بے اُرا مسنو، مشکل حالیت اٹی ہم پاکستانی تا جوزہ ءِ خناٹ حیران مسٹ۔ داکان مست تینا تران اٹی اوکانفرنس اٹی بشخ ہلوک آ مہمان تا منت واری ءِ ہرفے۔ انتونیوگوتریس پارے کہ بھسکار نوکاپ آن پاکستان نا بھلو بشخ اسے نسخان رسینگانے، پاکستان نا الس نوکاپ زہمی تیکن است بھلنی نا درشانی ءِ کرینو۔ اقوام متحدہ نا سیکرٹری جنرل پارے کہ چاگڑد اٹی کاربن نا پیشن تمنگ اٹ پاکستان نا بشخ اسہ درسد ہم اف، بھسکار نوکاپ نا زموار پاکستان اسُل مننگ کپک۔ اوپارے کہ کانفرنس دا مریس سفر نا بناءِ ہرادے غٹ اواری اٹ طے کننگ نا ءِ۔ پاکستان نا پوسکن تفنگ و بحالی ٹی شریداری نا سرحال آ جنیوا ٹی مروک آ جہانی کانفرنس نا مہمانداری ءِ وزیراعظم محمد شہباز شریف و اقوام متحدہ نا سیکرٹری جنرل انتونیوگوتریس کننگ اٹی ءُ۔ پاکستان کانفرنس اٹی پوسکن تفنگ و نوکاپ آن زہمی علاقہ غاتا بحالی نا فریم ورک اس پیش کرے۔ وزیراعظم محمد شہباز شریف و وزیرخارجہ بلاول بھٹو زرداری تینا تران اٹی نوکاپ آن زہمی علاقہ غاتا پوسکن تفنگ و بحالی نا ڈٹ ءِ عملی دروشم اس تننگ کن جہانی کمکاری و مریس مدتی شریداری نا اہمیت آ زور شاغار۔
