جنیوا ۔ 09 جنوری (اے پی پی) حکومت پاکستان و اقوام متحدہ نا اسیجائی مہمانداری ٹی دوشنبےنادے آ جنیوا ٹی مروک آ ’’ریزیلیئنٹ پاکستان‘‘ جہانی کانفرنس جہانی کمکاری نا دوئی کننگ وملک ءِ 2022 نا بھسکار نوکاپ نا چیلنج آتون مون تننگ اٹ کمک کن مریس مدتی شریداری استوار کننگ آ زور شاغانے۔ کانفرنس اٹی حکومت، سرکاری و نجی بشخ آتا راہشون و سول سوسائٹی نا پنی آ شخصیت آک نوکاپ آن پد پوسکن تفنگ و بحالی نا بھلا چیلنج تون مون تننگ کن پاکستان نا الس و حکومت نا کمکاری کن بشخ ہلکر، وزیراعظم محمد شہباز شریف و اقوام متحدہ نا سیکرٹری جنرل انتونیوگوتریس وزیرخارجہ بلاول بھٹو زرداری تون اوار ملک انا بدترین نوکاپ نا بھسکاری آن بے اُرا مروک آ 33 ملین بندغ آتا گرج آتے پورو کننگ و پوسکن تفنگ نا گام گیج آتیا زور شاغار۔ دوشنبےنادے آ ریزیلیئنٹ پاکستان آ جہانی کانفرنس آن تران کرسا وزیراعظم پارے کہ ای دا وخت آ تینتون دا کانفرنس نا اسیجائی مہمانداری ءِ کننگ آ اقوام متحدہ نا سیکرٹری جنرل انتونیوگوتریس نا است انا حب اٹ منتواری ءِ ہرفیوہ، انتئے کہ او تیرمہ ٹی پاکستان اٹی بروک آ دا بھلا آفت اٹی پدریسہ پاکستان نا توار و ہمدرد سنگت مرسا کرے، دا تنکی نا وخت اٹی سیکرٹری جنرل نا اخلاقی مخ تفی و سرکڑدہ ئی کن نن مدام منت وار اُن۔ ای بھاز انگا سربراہان مملکت و حکومت تون اوار اوار وزیر و ایلو شریدار آتا ہم منت وار اُٹ ہرا اینو ننتون اوار مسنو۔ وزیراعظم پارے کہ نن جہانی تاریخ نا اسہ اہم ءُ موڑاسے آ ٹی اُن۔ وسیع بدلی نا دور ننا زند و ملک آتیا داکان زیات ترندی اٹ تالان مننگ ءِ ہرانا نن تصور ءِ ہم کننگ کپنہ۔ اگہ نن غٹ ءِ زندہ رہینگوئی ءِ تو غٹ ءِ شونداری نا مزل آتے طے کننگ کن ہلر۔ اوپارے کہ کثیر الجہتی کہول آ گڑاس دورس فیصلہ کروئی مریک، ہرا حقیقت اٹ ارٹ میکو جہانی جنگ آن پد کروک آ مداخلت آتیان کیہی زیات ءُ، بھاز انگا پدتموک ملک آتیانبار پاکستان ہم کوویڈ۔ 19دینی ناجوڑی، جہانی مالیاتی تنکی، و دے ٹکی یورپ اٹی جھیڑہ غاتا ترند اثر آتون اوار جہانی تنکی تیٹی اختہ مسنے۔ ہندا سوب ءِ کہ دا باسنی نا موسم آن مست پاکستان مہالو آن خور، ایندھن و زرگزرانی تنکی تا اسہ ناگوار چرجوئی اسے تون مون تسکہ، و آئی ایم ایف و کثیر جہتی شونداری بینک آتون اوار پیشن نا امداد ہلنگ آ بیوس ئسک ولے دا 2022 نا بھسکار نوکاپ ءِ ہراننے اسہ خطرناک کنارہ سے آ سرکرینے، ننا مچ آنظام ءِ دا پوسکن آ بے گمانی لوڈو اونا نتیجہ ٹی پیچیدہ و چندی چیلنج آتا اسہ چرجوئی اس ایسونے بسنے۔ وزیراعظم پارے کہ بشام نا پِر و سونامی 33 ملین بندغ آتے زہمی کرے، 80 لکھ بے اُرا مسر، 1700 آن زیات بندغ آک زوال و ہزار آک ٹھپی مسر، 20 لکھ آن زیات اُرابھس مسر، نوکاپی دیر تیان 8000 کلومیٹرآن زیات سڑک، 3127 کلومیٹرریلوائی ٹریک ءِ نسخان رسینگا۔ وزیراعظم پارے کہ دا آفت غٹ آن زیات زہمی علاقہ غاتیٹی جان جوڑی و تعلیم نا خذمت آتے پورو وڑاٹ بھس کرینے۔ 10 لکھ مسن تتون اوار 26 لکھ خوانوک آ طالب علم آتا تعلیم اٹی اڑاند تمانے۔
