اسلام آباد۔ 30 دسمبر (اے پی پی) بنجائی وزیر ڈٹ بندی شونداری و خصوصی گام گیج پروفیسر احسن اقبال پارینے کہ اقتصادی و تکنیکی شونداری کن پاکستان بایدے چین آن ہیل کے، پاکستان و چین نا چاہندار و عملہ سی پیک ءِ ممکن کننگ اٹ اہم ءُ کڑد اس ادا کریر۔ اوداہیت ءِ جمعہ نادے آ داڑے چینی سفارت خانہ ٹی 2022 اٹی سی پیک نا رداٹ چندی ڈٹ آتیٹی کاریم کروک آ نمان پاکستانی عملہ ءِایوارڈ تننگ نادود آن تران کرسا پارے۔ بنجا ئی وزیر پارے کہ زرگزرانی و اقتصادی شونداری ءِ پک کننگ کن ملک اٹی پرامن چاگڑد نا جوڑ کننگ المی ءِ ہرا ہر حال اٹ بایدے مرے۔ ننے غٹ آن مست سیاسی سوگوی، پالیسی تا چرجوئی و راجی یکجہتی ءِ پک کروئی مریک انتئے کہ جھیڑہ و پولرائزیشن نا چاگڑد اٹی زرگزرانی شونداری مفک۔ بنجائی وزیر پارے کہ مہالو غٹ سمجھارہ کہ سی پیک اسہ ناممکن ءُ مشن اسے ولے پاکستان و چین نا چاہندار و عملہ دا ناممکن ءِ ممکن کریر ہرا ستاکڑزک۔ پاکستان و چین نا نیام اٹ تعلقداری ومتکن آ سنگتی ءِ مون آ تخسا بنجائی وزیر پارے کہ جہانی باندات آتیٹی مروک آ بدلی تیان تعلقداری تیٹی ہم بدلی بریک۔ ورلڈ آرڈر ملک آتے یکجا کیک و ہراتم ورلڈ آرڈر بدل مریک تو ملک آتا سنگتی ہم زہمی مریک ولے پاکستان و چین نا سنگتی جہانی امور و سفارت کاری نا غٹ اصول آتے غلط ثابت کرینے، ہڑتوم آ ملک آتا نیا م اٹ بے مٹ و یکتا وڑنا تعلقداری ءِ، آہنی ایلم کون آ تصور و لوز آک ایلو ملک آتا نیام اٹی افس ولے دا غٹ جملہ پاک چین سنگتی و ایلمی نا کڑمبی و سوگوی نا ڈیک ءِ تننگ ءِ۔ بنجائی وزیر پارے کہ تاریخی وڑاٹ پاکستان و چین اقتصادی تعلقداری آن بیدس سیاسی تعلقداری، سلامتی و اقتصادی کمکاری تون اوار چندی بشخ آتیٹی اسہ ایلو نا بھاز خڑک ئسر ولے 2013 ٹی ہراتم نواز شریف دُوارہ اقتدار ءِ سنبھالنگ آن پد چین نا دورہ ءِ کرے تو ہڑتوم آ ملک آتا نیام اٹ سی پیک آ کاریم بناکننگ کن 46 ارب ڈالر نا مفاہمت نا یات داشت آتیا دستخط کننگا، چین پاکستان اقتصادی راہداری نا نتیجہ ٹی پاکستان بجیل نا کمتی نا مون ءِ تورے و ملک انا مواصلاتی پنجر ءِ گچین کرے۔ احسن اقبال پارے کہ سی پیک نا مسخت چین نا واپاری فائدہ غاتے مون آ دننگ اف بلکن پاکستان نا کمک ءِ کننگ ئسک ہرا چین و اسہ خڑکی سٹریٹجک پارٹنر ءُ، دا ڈٹ انا مسخت پاکستان نا زرگزران ءِ گچین کننگ و زرگزران نا کشاری پنجر ءِ صنعتی پنجر اٹ بدل کننگ ئس۔ پاکستان اٹی چین نا سفیر نونگ رونگ داوخت آ تینا تران اٹی پارے کہ 2022 اٹی جہانی زرگزرانی بدحالی و پاکستان اٹی بروک آتاریخی نوکاپ نا مشکل آتیان پد ہم چین پاکستان اقتصادی راہدساری ڈٹ آتیا گچین پیشرفت مسنے۔ اوپارے کہ اینخو سال اٹی چین پاکستان اقتصادی راہداری ننا ہڑتوم آ کنڈآتا تعلقداری و گپ وتران نا اہم ءُ سرحال اس مسنے۔ صدر شی جن پنگ 2 نومبر آ چین نا سرکاری دورہ ٹی وزیراعظم شہباز شریف تون اوڑدہی کرے۔ چینی سفیر پارے کہ ہڑتوم آ ملک آک جے سی سی نا پبی کاریم اٹ اتنگ و سی پیک نا ڈٹ آتے گچین وڑاٹ مون آ دننگ و دا سی پیک ءِ بیلٹ اینڈ روڈ انیشیٹیو نا اہم ءُ وڑاس جوڑ کننگ کن سنبرینگوک ءُ۔ اوپارے کہ سی پیک نا رداٹ چندی بشخ آتیان جوان ءُ خبر بننگ اٹی ءِ، چین نا کمک اٹ گوادر بندرگاہ نا ایسٹ بے ایکسپریس وے جون آن کاریم نا بناءِ کرینے، ہراڑان بندرگاہ نا کمک اٹ رابطہ ٹی ودکی مسنے و ہندا نا کمک اٹ داسہ اِرالکھ ٹن کھد انا ات و در مننگ ءِ، کروٹ ہائیڈرو پاور جون اٹی ہم کمرشل آپریشن نا بناءِ کرے ہراڑان اڑزان و چاگڑد دوست بجلی فراوان مننگ ءِ، دا ڈٹ آن سالانہ 3.5 ملین میٹرک ٹن کاربن نا پیش تمنگ اٹی کمتی بریک۔ تھر اٹی ٹی ای ایل و نووا پاور پلانٹ آک ہم ہندی کولاآن کاریم نا بناءِ کریر۔ شنگھائی الیکٹرک تھرکول بیسڈ پاور پلانٹ ءِ نیشنل گریڈ اتون منسلک کننگانے۔ پاکستان چائنا ریڈ چلی کنٹریکٹ فارمنگ پروجیکٹ نا رداٹ صوبہ پنجاب و سندھ اٹی شش ماڈل فارم فصل تننگ ءُ، دا ڈٹ آتیان 700 ٹن بارُن مرچ انا پیدوار نا کساس ءِ۔ دا ہڑتوم آملک آتا نیام اٹ کشاری کمکاری نا عظیم لائخی نا بیرہ اسہ عکس اسے۔ اوپارے کہ سال 2021 اٹی پاکستان نا کشاری مصنوعات نا فاضل واپار اٹی 13 گنا ودکی مس، داسال فاضل کشاری واپار اسہ ارب ڈالر نا بڑزکو نگا کچ آن گدرینگ نا گمان ءِ۔ چینی سفیر پارے کہ چین پاکستان اقتصادی راہداری ڈٹ آتا رداٹ داتم اسکان 192،000 مخلوق ءِ روزگار فراوان کننگا، 6000 میگاواٹ بجلی نا فراوانی مس، 510 کلومیٹر ہائی ویز جوڑ مس وخت اس کہ 886 کلومیٹر ٹرانسمیشن لین جوڑ کننگانے۔ ہراپاکستان نا راجی و اقتصادی شونداری نا سوگو بنداو ءِ تخانے۔ اوپارے کہ سی پیک نا سرسہبیک پاکستان و چین ہڑتوم آ ملک آتا چاہندار و عملہ نا اسیجائی کوشست آتیان بیدس ممکن افس۔ چینی سفیر پارے کہ ساڑی ہی ٹی چین کوویڈ نا بابت پالیسی تیٹی بدلی کرینے اوفتے ٹی جہانی جہاز آتا کچ ءِ کنٹرول کننگ نا گام گیج آتے اسہ کنڈ کننگ و کاروبار و تعلیم کن مخلوق نا نیام اٹ ہن و برنا بحالی اوار ءِ۔ دا گام گیج آتیان مخلوق نا نیام اٹ رابطہ ءِ پین مون آ دننگک و چین و پاکستان نا نیام اٹ زرکاری ٹی آسانی مریک، پاکستانی عملہ چین اٹی ہیلکاری پروگرام اٹی بشخ ہلنگ کیرہ۔ ہندا وڑ پین طالب علم تعلیم کن چین آ ہننگ کیرہ، و سی پیک نا ڈٹ آتیٹی اوار مننگ کن پدی بننگ کیرہ۔ اومیت ءِ کہ سی پیک ڈٹ آتا چینی و پاکستانی عملہ داوخت آن فائدہ ہرفرہ و عملی گام گیج آتا کمک اٹ سی پیک ءِ مون آ دننگ و چین و پاکستان نا نیام اٹ آہنی سنگتی ءِ پین سوگو کننگ اٹ تینا کڑد ءِ ادا کیرہ۔
