ترکی، پاکستان، روس، ملائیشیا، انڈونیشیا تون اوار دنیا نا 29 ملک آتا سروک آک شریک ئُ
بیجنگ۔ 14مئی (اے پی پی) بیلٹ اینڈ روڈ فورم جہانی کمک نا بنائی سیشن یک شنبے نا دے آ داڑے چین انا صدر ژی جن پنگ نا کماشی ٹی بناءکرے ہرانا مسخت جہانی کمکاری ئِ سوگو شریداری نا گیشتر بنداو نیٹ ورک انا اڈتننگ ئِ، دا بڑزکو کہول انا فورم اٹی ترکی، پاکستان، روس، ملائیشیا، انڈونیشیا تون اوار دنیا نا 29ملک آتا سروک آک شریک ئُ وخت اس کہ 130 ریاست آتا 1500 آن زیات ڈل آک ہم دافورم اٹی شریک ئُ۔ فورم اٹی اٹلی، فلپائن، افریقی و نیامی ایشیائی ریاست آتا ہم نمائندگی ئِ۔ وزیراعظم پاکستان محمد نواز شریف ، وزیراعلیٰ پنجاب محمد شہباز شریف، وزیراعلیٰ سندھ سید مراد علی شاہ ، وزیراعلیٰ خیبر پختونخوا پرویز خٹک، وزیراعلیٰ بلوچستان ثناءاللہ زہری، بنجائی وزیر احسن اقبال، اسحاق ڈار، خرم دستگیر ، خواجہ سعد رفیق، انوشہ رحمان و وزیراعظم نا سلاہکار خارجہ امور سرتاج عزیز تون اوار فورم اٹی شریک ئُ۔ فورم نا اولیکو دے بنائی سیشن آن بیدس بڑزکو کہول انا اوڑدہی تیا تالان ئِ و دوشنبے نا دے اسہ گول میز کانفرنس اس اڈ ہلیک ہراٹی فورم اٹی بروک آ غٹ جہانی راہشونک شریک مریرہ۔ چینی صدر ژی جن پنگ بنائی سیشن آن تران کرسا اونا ون بیلٹ ون روڈویژن آ روشنائی شاغا وخت اس کہ او علاقائی شونداری و کمکاری نا اہمیت آن ہم معلومدار کرے۔
