اسلام آباد۔ 17 ستمبر (اے پی پی) صدر مملکت ڈاکٹر عارف علوی سوئی ناردرن گیس پائپ لائنز لمیٹڈ ءِ غیر منصفانہ بل آ نظرثانی کننگ نا پارت کرسا بنجائی محتسب نا فیصلہ نا برخلاف دائر گیس کمپنی نا درخواست ءِ مسترد کرے۔ ایوان صدر میڈیا آفس آن جاری بیان نا رداٹ صدر مملکت پارے کہ گیس کمپنی شاری آن بے سوب بل، میٹر نا نہاد آ ہلسا بدانتظامی نا مرتکب مس، گیس کمپنی پشاور نا شاری ءِ 44 ہزار روپئی آن زیات نا بل اس بے سوب چارج کرے۔ صدر مملکت پارے کہ شاری نا گیس میٹر اسہ ایلو آ سم کاری ٹی خراب مسوسس، صارف نا ہچ ءُ غلطی اس اف، غاوتروک تینا میٹر ءِ ملوک آ نسخان نا ایف آئی آر درج کرفے، دا میٹر ءِ نسخان ملنگ نا باندات ءِ نئے کہ میٹر تون چھیڑ چھاڑ نا باندات۔ گیس کمپنی نا رپورٹ اٹی ہم شاری نا کنڈآن گیس معاہدہ نا خلاف ورزی نا ذکر اف، شاری نا باضابطہ درخواست آن پد کمپنی گیس میٹر ءِ بدل کرے، گیس کمپنی اوگرا قاعدہ و ضابطہ نا رداٹ گیس میٹر 5 دے انا تہہ ٹی ہندی لیبارٹری آ گدریفنگ آ بے سہب مس۔ صدر مملکت پارے کہ میٹر ءِ اسہ تُو آن زیات وخت تدینگ انگ آن پد ہندی لیبارٹری آ گدریفنگا، کمپنی تون جرمانہ خلنگ نا اختیار اف، دااسہ مجاز عدالت اسے نا دائرہ کار ءِ ، میٹر تون چھیڑ چھاڑ نا مد غیر معین مننگ آ بیرہ اسہ سال اسکان نا بل وصول کننگ مریک۔
