اسلام آباد۔ 19جولائی (اے پی پی) کارفنانسنگ نا رداٹ بینک آتا کنڈآن وام تا فراوانی ٹی تدوک آ مالی سال انا اولیکو 11تُواٹی 41درسد ودکی مسنے۔ اسٹیٹ بینک آف پاکستان (ایس بی پی) نا رپورٹ نا رداٹ تدوک آ مالی سال اٹی جولائی آن مئی 2020-21ء ٹی کارفنانسنگ نا مد اٹی وام تا جاری کننگ 279.5ارب روپئی اسکان ودا وخت اس کہ مالی سال 2019-20ء نا ایسر آ وام تا فراوانی نا کچ 211.11ارب روپئی ئسک۔ ہنداوڑ مالی سال 2020ء نا مقابلہ ٹی تدوک آ مالی سال 2021ء نا اولیکو یانزدہ تُو اٹی گاڈی (کار)تا ہلنگ کن بینک آتا کنڈآن وام تا فراوانی 86.5ارب روپئی یعنی 41درسد ودکی ریکارڈ کننگانے۔ رپورٹ نار داٹ کارتا ہلنگ کن اسلامک بینک آتا کنڈآن وام تا فراوانی ٹی نمان ودکی مسنے و جم وام تے ٹی اسلامی بینکاری نا بشخ انا تروک آ وام تا کچ 60درسد اسکان ودانے۔ عارف حبیب لمیٹڈ نا شعبہ ریسرچ نا سروک طاہر عباس دا بابت پارینے کہ کوویڈ۔ 19آن زہمی زرگزرانی سرجزآتا بحالی کن مرکزی بینک انا کنڈآن شرح سود اٹی کمتی نا فیصلہ غان ہندی زرگزران اٹی نمان گچینی مسنے ہرانا سوب آن وام تا جاری کننگ اٹ ودکی مسنے۔ اوپارے کہ حکومت نا گام گیج آتے ٹی کشاری زرگزران نا شونداری آن فنانسنگ نا کچ اٹی پین ودکی نا گمان ءِ۔
