اسلام آباد۔ 17 ستمبر (اے پی پی) بھارت انتہاپسند ہندوتوا نا ایجنڈا و مذہبی بے سگی نا پالیسی آ عمل کرسا مقبوضہ کشمیر اٹی اسلامی اسکالر آتا دزگیری تا بناءِ کرینے، اقوام متحدہ نا جنرل اسمبلی نا نیویارک اٹی مروک آ دیوان آن بیرہ منہ دے مست و جنیوا ٹی انسانی حق کونسل نا برجا دیوان نا وخت آ بھارت نا غیرکانودی کوزہ گیری ٹی جموں و کشمیر اٹی عالم دین تا دزگیری مذہبی ہند آتیا کوزہ نا بھارتی مہم نا بناءِ۔ ہفتہ نا دے آ میڈیا حوال آتا رداٹ آجوئی پسند سرکڑدہ غاتیان داسہ کشمیری تا سوگو توار ءِ توننگ کن پنی آ کشمیری مذہبی راہشون تے دزگیر کننگ نا بنا ءِ کننگانے ہرا انتہاپسند ہندوتوا نا ایجنڈا ءِ زوراکی اٹ نافذ کننگ نا سجفوک بھارتی ڈٹ انا بشخ اسے۔ بھارتی کوزہ گیر کمامدارآک تینا غیرکانودی کوزہ گیری ٹی جموں وکشمیر اٹی مولانا عبدالرشید داؤدی، مولانا مشتاق احمد ویری، فہیم محمد رمضان و عبدالمجید ڈارالمدنی تون اوار چندی پنی آ اسلامی اسکالر آتے مون آ کانود پبلک سیفٹی ایکٹ نا رداٹ مقدمہ نوشتہ کرسا دزگیر کرینے و اوفتے بدنام زمانہ کوٹ بلوال زندان جموں آ گدریفنگانے۔ دا دزگیری تیا کل جماعتی حریت کانفرنس نا آزاد کشمیر شاخ انا کنوینر محمود احمد ساگر سخت ردعمل ظاہر کرسا پارے کہ مقبوضہ کشمیر اٹی آجوئی سلاہ درشانی آ مہالو آن پابندی خلوک ءِ انتئے کہ آجوئی پسند کارندہ و صحافی تیا پبلک سیفٹی ایکٹ نا رداٹ مقدمہ نوشتہ کننگ انگ ءِ، داسہ کشمیری تا توار ءِ توننگ کن اوفک مذہبی اسکالر آتے دزگیر کرینو، دا گام گیج آتا غٹ آن بھلا مسخت کشمیری تے تینا آجوئی نا خواست ءِ ہلنگ آ بیوس کننگ ءِ۔ سیاسی کارندہ و مبصر آک دا گام ءِ مقبوضہ علاقہ ٹی پنی آ مذہبی ہند آتون اوار اوار وقف بورڈ انا ڈغار و ملکیت آتیا زوراکی اٹ کوزہ کننگ نا بھارتی ناپاک ڈٹ انا بناگوندانو۔ بھارت اٹی برسراقتدار بی جے پی حکومت مہالو آن وقف بورڈ انا کنٹرول ءِ سنبھالانے۔ سیاسی جاچکار آتا پاننگ ءِ کہ داوڑنا ہر ناپاک گام مچ آ مقبوضہ کشمیر اٹی برانز و بھلو کچ اسے آ بھارت مخالف فضااس ودی کننگ کیک۔ کشمیری راہشون سید مشتاق گیلانی ‘‘اے پی پی’’ ءِ پارے کہ مذہبی راہشون تے دزگیر کننگ کشمیری تے اوفتیان مُر کننگ کن اسہ پیشگی گام اسے۔ اوپارے کہ دااسکالر آتا بھلو کچ اسے ٹی پیروکار ءُ ہنداخاطرآن اوفتے ٹی ہروڑنا بھارتی عزم آتا برخلاف الس ءِ متحرک کننگ نا لائخی ءِ۔ کشمیری سرکڑدہ غاک داہیت انا پدریسہ پیدواری ءِ کننگ اٹی ءُ کہ بھارتیہ جنتا پارٹی (بی جے پی) مقبوضہ جموں وکشمیر نا مسلم شناخت ءِ چٹفنگ کن مذہبی و سیاسی لحاظ اٹ اہم غٹ ہند و عہدہ غاتیا کوزہ کننگ اٹی ءِ۔ کل جماعتی حریت کانفرنس نا وائس چیئرمین شبیر احمد شاہ بدنام زمانہ تہاڑ زندان آن اسہ کلہو اسے ٹی دا گام ءِ مسلمان تا مذہبی باندات آتیٹی پاش آن پاش نیام تمنگ و خلاف ورزی گوندانے۔ اوپارے کہ دا بدبختی نا ہیت اسے کہ بھارت نا ہندو انتہاپسند تنظیم آرایس ایس نا نظریہ غان زہمی فاشٹ نریندر مودی نا کماشی ٹی بھارتی حکومت کشمیری تیان ہر حق ءِ پُلنگ آن پد داسہ وقف بورڈ انا ڈغار و میرات آتیا کوزہ کننگ اٹی ءِ۔ کشمیریک خدشہ ظاہر کرینو کہ بھارتی کمامدار آک سری نگر نا پنی آ عئید گاہ قبرستان آ کوزہ کننگ نا ڈٹ اس جوڑ کرینو، ہرادے کشمیریک تینا تاریخی شہید آتا قبرستان نا سوب آن بھاز عزت و شرف ایترہ۔ بھارتی کمامدارآتا خنک چندی خانقاہ تیاہم اریر ہرافتے ٹی خانقاہ معلیٰ و بلبل شاہ ئسک ہم اوار ءُ۔ داناپاک گام گیج آتا مسخت کشمیر نا مسلم شناخت ءِ چٹفنگ ءِ۔ کل جماعتی حریت کانفرنس نا آزاد کشمیر شاخ ہم دا دزگیری تیا سخت برانز کرینے۔ کل جماعتی حریت کانفرنس نا جنرل سیکرٹری شیخ المتین‘‘اے پی پی’’ تون گپ وتران کرسا دا گام ءِ کشمیری مسلمان تا مذہبی باندات آتیٹی پاش آن پاش نیام تمنگ اس گوندسا پارینے کہ بھارت اسہ کنڈآ غیرکانودی وڑاٹ کشمیری تا ڈغار تے پُلسا مقبوضہ علاقہ ٹی مخلوق نا کشت وخون ءِ کننگ ءِ وخت اس کہ ایلو کنڈآ کشمیری تے اوفتا مذہبی میرات آتیان محروم کننگ اٹ لگوک ءِ۔ اوپارے کہ بھاز است ہسونی نا ہیت اسے کہ بھارت مقبوضہ کشمیر اٹی نئے بیرہ مذہبی اسکالر آتے دزگیر کننگ ءِ بلکن او ورناچین ءِ مذہب آن مُر کننگ و صوفی تا گل زمین اٹی فحاشی و عریانی ءِ مون آ دننگ کن مذہبی ادارہ غاتے ہم بند کننگ ءِ۔ اپسالایونیورسٹی ٹی امن و جھیڑہ غاتا پٹ وپول نا پروفیسر اشوک سوین اسہ ٹویٹ اسے ٹی پارے کہ مقبوضہ کشمیر اٹی اسلامی اسکالر آتا دزگیری امن نا پنی آ کارندہ غاتے ہم حیران کرینے، کشمیر نا پنی آ اسلامی مذہبی راہشون تے دزگیر کننگانے ولے اسٹ اس ہم دا تپک کہ داوڑانت اکن کننگا۔ مقبوضہ کشمیر اٹی داوخت آ غٹ آجوئی پسند سرکڑدہ غاک زندان و اُراتیٹی نظر بند ءُ وخت اس کہ سد آ صحافی، انسانی حق انا کارندہ، وکیل و سیاسی کارندہ غاک ہم زندان تیٹی بھلو وخت اسے آن بندی ءُ، بھارتی کوزہ گیر کمامدارآک مقبوضہ علاقہ ٹی ہر ہمو بندغ ءِ دزگیر کننگ اٹی ءُ ہرا اوفتاخیال اٹی الس آ اثرانداز مننگ یا انسانی حق انا بھلا خلاف ورزی تے بے نقاب کننگ نا لائخی تخرہ۔ داہیت ذکر انا قابل ءِ کہ 5 اگست 2019 آن پد آن بھارت اٹی برسراقتدار مودی حکومت مقبوضہ جموں وکشمیر نا خصوصی حیثیت ءِ چٹفسا لکھ آ غیرکشمیری تے ڈومیسائل سرٹیفکیٹ جاری کرے و ڈغاری کانود ءِ بدل کرے تانکہ بھارتی باتیک کشمیر اٹی میرات ہلنگ کیر، مقبوضہ علاقہ ٹی گچین کاری حلقہ غاتیٹی ہندو تا حق اٹی بدلی ہم کننگانے وخت اس کہ 25 لکھ آن زیات غیرکشمیری تے وونٹ انا حق ہم تننگانے دا غٹ گام گیج آتا مسخت کشمیر نا مسلم گیشتری ءِ اقلیت اٹ بدل کننگ ءِ۔ دا غٹ راستکی تیان پد ہم جہانی برادری خاص وڑاٹ اقوام متحدہ کشمیری تا ڈکھیائی و بھارتی ریاستی دہشت گردی آ چپ تماشائی جوڑ مسنے۔ اقوام متحدہ نا سلامتی کونسل نا منظور مروک قرارداد آن پد ہم کشمیر داسہ ہم جہانی ادارہ نا ایجنڈا غا ایسر نا چاری غٹ آن متکن آ ویل ءِ ہرا جہانی امن نا مون آ دننگ اٹ تینا کروک آ دوہرا معیار ءِ بے نقاب کیک۔ پاکستان اقوام متحدہ نا انسانی حق کونسل آن ہم خواست کرینے کہ او غیر فعال تماشائی جوڑ مف انتئے کہ بھارت کشمیری الس نا بنداوی حق و اوفتا حق خودارادیت ءِ توننگ کن مقبوضہ علاقہ ٹی ریاستی دہشت گردی کننگ ءِ۔ جنیوا ٹی بناکروک آ 47 باسکی انسانی حق کونسل نا دیوان اٹی عام شرہ ٹی اقوام متحدہ ٹی پاکستان نا آخبتی نمائندہ سفیر خلیل ہاشمی پارے کہ انسانی حق کونسل نا گڑاس باسک آتا مجرمانہ چُپی نا سوب آن پن انا غٹ آن بھلا جمہوریت بھارت اٹی انسانی حق انا ڈوہ تشویشناک حداسکان ودنگ ءِ۔
