اسلام آباد۔ 13 ستمبر (اے پی پی) اسپیکر قومی اسمبلی راجہ پرویز اشرف پارینے کہ گلوبل وارمنگ جہانی ءُ ویل اسے و دانا جہانی کہول آ ہی نوٹس ءِ بایدے ہلنگے، پاکستان تون اوار پدتموک ملک آتیٹی موسمیاتی بدلی تا اثرآتیان انسانی زند ءِ بھاز خطرہ مون تروک ءِ ہراملک آتا جہانی درجہ حرارت اٹی ودکی نا سوب جوڑ مروک آ گیس آتا اخراج اٹی بھلو بشخ اسے اوفک دا چرجوئی ٹی تینا نظام آ نظرثانی بایدے کیر، اگہ دنیا گلوبل وارمنگ نا باندات نا مون ءِ توننگ کن گچین گام گیج کتو تو حالیت آک وس آن پیش مریرہ، پاکستان قصور وار مفننگ آن پد ہم ساڑی آ نوکاپ و پِر تیان مروک آ بھسکاری نا دروشم اٹ اسہ بھلو قیمت اس ادا کرینے، جہانی برادری دا حالیت آتا درک ءِ خلے۔ سے شنبےنادے آ پارلیمنٹ ہاؤس اٹی بین الپارلیمانی یونین نا ایشیا پیسفک نا ریجن نا مسٹ میکو سیمینارنا بنائی دیوان آن تران کرسا اوایشیائی ملک آتیان تعلق تخوک آ غٹ پارلیمنٹرین آتے بخیر اٹ پارسا پارے کہ دا سیمینار پاکستان نا قومی اسمبلی و ہزاریہ شونداری ہدف آتا دوئی کننگ کن جوڑ پارلیمانی ٹاسک فورس انا سخت کوشست آتے اٹ اڈتننگانے۔ اوبین الپارلیمانی یونین نا صدر و رٹے پچیکو و آئی پی یو نا مچ آ ٹیم انا ہم منت واری ءِ ہرفے۔ اوپارے کہ بین الپارلیمانی یونین 1989 ٹی جوڑ مس، دا ادارہ جہانی پارلیمانی برادری نا اسہ اہم ءُ فورم اسے ہرا دنیا ٹی گچین جمہوری نظام کن تینا کڑد ءِ ادا کننگ ءِ۔ اوپارے کہ دا سیمینار اٹی ایشیا پیسیفک ڈیہہ تون تعلق تخوک آ پارلیمنٹرین و مندوبین تے ڈیہہ ٹی چیلنج آتا رداٹ جوان شونداری نا تصور کون آ سرحال آتیا سجفنگ اٹ کمک رسینگک۔ اوپارے کہ موسمیاتی بدلی، بین و غذائیت نا کمتی ورناتیکن آب اٹ تعلیم و غٹ تپہ غاتسکان جان جوڑی نا بریبر آسراتی تا فراوانی ءِ پک کننگ کون آ ویل آتا بابت غٹ پارلیمنٹرین تے گچین کانود جوڑ کننگ و ایلو اہم گام گیج آتے ہرفنگ کن لائحہ عمل اس مرتب کننگے۔ اوپارے کہ دا سیمینار ننے 2030 اسکان ہزاریہ شونداری ہدف آتے دوئی کننگ کن قومی و علاقائی حکمت عملی تا اول سرآن جاچ ءِ ہلنگ نا اسہ وخت آ موقع اس فراوان کیک۔ اوپارے کہ کوویڈ۔ 19 کون آ دین انا سوب آن پاکستان تون اوار ایلو پدتموک ملک آتے بھلا راجی و اقتصادی جھٹکہ تون مون تروئی تما۔ اوپارے کہ داکان پد موسمیاتی بدلی نا منفی اثرآتیان زہمی مرسا چندی ڈیہہ تیٹی خشک سالی نا حالیت و گڑاس ڈیہہ تیٹی ترند پِر و نوکاپ نا حالیت مون تروک ءِ۔ اوپارے کہ پاکستان ایشیا پیسفک ملک آتیکن دا اہم سیمینار نا مہمانداری ءِ اسہ نازرک ءُ موڑاسے آ کننگ ءِ انتئے کہ بیرہ منہ دے مست ننا قطبی مش تیٹی بشام نا ترند پِر و گلیشیئر نا دیر مننگ نا سوب آن نوکاپ بس ہراڑآن 1300 آن زیات بندغ زوال کریر و 33 ملین بندغ بے اُرا مسر کم و ود 30 ارب ڈالر مالیت نا ہند، سڑک، ریلوائی نا نظام ، پول، ساہدار و فصل آتا نسخان مس۔ اوسمینار نا غٹ بشخ ہلوک آتیان خواست کرے کہ او انسانی سلامتی کن د سنگین جہانی موسمیاتی بدلی نا چیلنج آ تینا چکار ءِ تخر۔ اوپارے کہ موسمیاتی بدلی مچ آدنیا ٹی بھسکاری کننگ ءِ، یورپ 500 سال اٹی تینا بدترین خشک سالی تون مون تننگ ءِ ، چین ءِ باسنی نا بھلا ریسہ غاتا مون تروک ءِ ہراڑآن دریا و جھیل آک خشک مسنو وخت اس کہ اسہ امریکی ریاست نا شاری تے پاننگانے کہ او اُراتے خورک کیر انتئے کہ داڑے پین نوکاپ نا خطرہ ءِ، 2021 نا موسمیاتی بدلی رسک انڈیکس دا پاش کیک کہ جہانی کاربن نا اخراج اٹی پاکستان نا بشخ اسہ درسد آن ہم کم ءِ ولے اوکان پد ہم موسمیاتی تنکی نا غٹ آن زیات خطرہ تخوک آ ملک آتیٹی پاکستان نا ہشت می نمبر ءِ۔ اوپارے کہ اقوام متحدہ نا سیکرٹری جنرل انتو نیو گوتریس نا ساڑی آ دورہ پاکستان نا وخت آ اونوکاپ زدہ علاقہ غاتا دورہ ءِ کرینے۔ اوجہانی برادری ءِ مخاطب کرسا پارے کہ اینو پاکستان ءِ دا حالیت آتا مون تروک ءِ پگہ اونا جاگہ غا پین ملک اسے ٹی ہم مننگ کیک۔ اوپارے کہ جہانی درجہ حرارت اٹی ودکی نا حالیت آ جہانی حکمت عملی اس مرتب کننگ نا گرج ءِ۔ اوداوخت آ جی 20 ملک آتیا زورشاغا کہ او تینا قومی گرین ہاؤس گیس آتا اخراج اٹی کمتی نا ہدف آتیٹی ودکی کیر ۔ اوپارے کہ اقوام متحدہ نا سیکرٹری جنرل پاکستان کون آ موسمیاتی خطرہ غاتا گواچی ملک آتیکن وام تیان نجات نا پوسکن ءُ وڑوڈول اسے نا تعین نا گرج آ ہم زور شاغانے ہرانا رداٹ او ومدار ملک آتا وام تا ہل و تس انا مخ تفی ءِ کرے و پارے کہ وامدار قوم پیشن نا وام تا ادائیگی ءِ برجاتخنگ نا جاگہ غا تینا چاگڑد نا ڈٹ آتیا ہمو زر ءِ خرچ کرسا داوام تا ادائیگی ءِ کننگ کیک۔ دیوان اٹی سیمینار نا بشخ ہلوک آتے پاکستان اٹی نوکاپ و موسمیاتی بدلی تیان مروک آ بھسکاری تیا مبنی دستاویزی فلم اس نشان تننگا۔
