اسلام آباد۔14مئی (اے پی پی): مزن وزیر محمد شہباز شریف ءَ گشتگ کہ پاکستان ایمنی دوستیں ملک انت ءُ ہمے جذبہ ءِ تہا بھارت ءِ گوما جنگ بندی ءِ واستہ تیاری ءِ درشانی کتگ۔ پاکستان آیوکیں وھد ءَ ھرچ وڑیں زوراکی ءِ دیم ءَ دارگ ءُ وتی وت واجہی ءُ سرزمین ءِ یکوئی ءِ رکھینگ ءَ تیار اِنت۔ مزن وزیر کارگس ءِ میڈیا ونگ ءِ نیمگ ءَ جاڑی بوتگیں بیان ءِ رد ءَ چار شمبے ءِ روچ ءَ مزن وزیر گس ءَ جمہوریہ آذربائیجان ءِ سفیر خضر فرہادوف ءَ مزن وزیر محمد شہباز شریف ءَ گوں گند ءُ نند کتگ۔ گند ءُ نند ءِ ساھت ءَ مزن وزیر ءَ جنوبی ایشیا ءَ گوستگیں کش ءُ چیل ءِ وھد ءَ پاکستان ءِ گوما بے مٹیں یکوئی ءُ کمک ءِ واستہ آذربائیجان ءِ براتیں الس ءِ صدر الہام علیف ءِ دل ءِ تہ ءَ چہ منت واری ءِ درشان کت۔ مزن وزیر ئَ گوشت کہ اے دوئیں ملک آنی نیام ئَ برجاھیں دوستی ءِ آدینک انت۔ مزن وزیر ءَ ’’آپریشن بنیان مرسس‘‘ ءِ سوبمندی ءِ سر ءَ پاکستان ءِ بہادریں سلاہ بندیں اُرد آناں گوں دلجمی ءَ توسیپ کنان ءَ گوشت کہ اے راجدپتری سوبمندی ءِ سر ءَ پاکستان ءِ اُلس اللہ تعالیٰ ءِ شگر ءُ منت وار اَنت۔ آئی ءَ گوشت کہ پاکستان ایمنی دوستیں ملک اِنت ءُ ھمے جذبہ ءَ بھارت ءِ گوما جنگ بندی ءِ سر ءَ دستخط کنگ ءِ واھشت ءِ درشان کتگ، البت پاکستان آیوکیں وھد ءَ ھرچ وڑیں زوراکی ءِ دیم ءَ دارگ ءُ وتی وت واجہی ءُ سرزمین ءِ یکوئی ءِ رکھینگ ءِ واستہ تیار اِنت۔ پاکستان ءُ آذربائیجان ءِ سیادی ءِ ھوالگ ءَ مزن وزیر ءَ دو نیمگی کمک ءِ تہ ءَ جوانیں پیشرفت ءِ سر ءَ دل یکیمی ءِ درشان کت۔ آئی ءَ گوشت کہ گوستگیں جولائی ءَ صدر الہام علیف ءِ پاکستان ءِ راجدپتری تر ءُ تاب معیشت، تجارت ءُ سرمایہ کاری ءِ شوبگ آنی تہ ءَ کمک ءِ تہ ءَ یک ھاسیں سنگ ءِ بوتگ۔ فروری 2025ءَ باکو ءِ تر ءُ تاب ءِ یات ءَ مزن وزیر ءَ پاکستان ءِ براتی سیادی آناں یک دومی ءَ را فائدگ مندیں اقتصادی شریکداری ءِ تہ ءَ بدل کنگ ءِ مھکمیں واھشت ءِ پدا زور دات۔ سفیر خزر فرہادوف ءَ مزن وزیر ءُ سرجمیں پاکستانی راج ءَ را دل ءِ جہلانکی ءَ چہ مبارکی دات۔ آئی ءَ جنوبی ایشیا ءَ ایمنی ءِ واستہ پاکستان ءِ کوشست آناں ساڑات۔ آئی ءَ گوشت کہ صدر الھام علیف دوئیں ملک آنی نیام ءَ براتی سیادی ءَ را سک باز ارزشت دنت ۔ دوئیں ملک آنی سروکی ءِ نیام ءَ دستخط بوتگیں تپاکی نامہ ءِ سر ءَ عمل درآمد ءِ تہ ءَ پیشرفت ءِ بابت ءَ گپ ءُ تران کنان ءَ آئی ءَ مزن وزیر ءَ را یکجائی دلچسپی ءِ توامیں پڑ آنی تہ ءَ دوئیں دوستیں ملک آنی نیام ءَ یکجائی ءَ را گیش کنگ ءِ واستہ وتی سرجمیں جزم ءِ دل یکیمی دات۔
