وزیراعلیٰ بلوچستان نیال اس خلسا بشام نا شجر کاری مہم نا بناءِ کرے

کوئٹہ۔ 14 اگست (اے پی پی) وزیراعلیٰ بلوچستان میر عبدالقدوس بزنجو وزیراعلیٰ سیکرٹریٹ اٹی پائن نا نیال اس خلسا بشام نا شجر کاری مہم 2022 نا بناءِ کرے۔ داوخت آ صوبائی وزیر زمرک خان اچکزئی میر نصیب اللہ مری میر محمد خان لہڑی عبدالخالق ہزارہ پارلیمانی سیکرٹری خلیل بھٹو صوبائی اسمبلی نا باسک قادر نائل و سیکرٹری جنگلات وجنگی حیات عمران خان ئسک ہم ساڑی ئسر۔ داوخت آ وزیراعلیٰ پارت کرے کہ شجر کاری مہم اٹی طالب علم و سول سوسائٹی ءِ ہم اوار کننگے و شجر کاری نا اہمیت نا بابت راج اٹ شعور تالان کننگے۔ اوپارے کہ ساڑی آ پِر تیان نسخان تو مس ولے تدوک آ دہ سال انا خشک سالی ہم چٹانے و ڈغار اٹی دیر انا کچ بڑز مننگ آن کشت وکشار و جنگل آتا بشخ آتیا مثبت اثر تمک۔ وزیراعلیٰ پارت کرے کہ درخت خلنگ آن ہم زیات اہم درخت آتا خیال ءِ تخنگ ءِ ہرادے ہر حال اٹ پک کننگے۔ اوپارے کہ شجر کاری مہم اٹی 40 لکھ نیال خلنگک۔