عدالت عالیہ بلوچستان اٹی پاکستان نا 75 می جشن آزادی نا رداٹ بیرک ءِ چست کننگ نا دود اس، چیف جسٹس بلوچستان ہائی کورٹ جناب جسٹس نعیم اختر اوغان بیرک ءِ چست کرے

کوئٹہ۔ 14 اگست (اے پی پی) عدالت عالیہ بلوچستان اٹی پاکستان نا 75 می جشن آزادی نا رداٹ بیرک ءِ چست کننگ نا دود اس اڈ ہلک ، چیف جسٹس بلوچستان ہائی کورٹ جناب جسٹس نعیم اختر اوغان بیرک ءِ چست کرسا دود انا باقاعدہ بناءِ کرے۔ دود اٹی عدالت عالیہ نا جج صاحب آک جناب جسٹس ہاشم خان کاکڑ، جناب جسٹس محمد اعجاز خان سواتی، جناب جسٹس محمد کامران خان ملاخیل، جناب جسٹس ظہیر الدین کاکڑ، جناب جسٹس عبداللہ بلوچ، جناب جسٹس روزی خان بڑیچ، جناب جسٹس عبدالحمید بلوچ، جسٹس اقبال احمدکاسی، جسٹس شوکت علی رخشانی ، جسٹس گل حسن ترین، جسٹس محمد عامر نواز رانا و جسٹس سردار احمد حلیمی ، رجسٹرار بلوچستان ہائی کورٹ راشد محمود آن بیدس جوڈیشل آفیسر آک، وکیل آک و چناتتون اوار الس پبی وڑاٹ بشخ ہلکر۔ چیف جسٹس بلوچستان ہائی کورٹ جناب جسٹس نعیم اختر اوغان دود آن تران کرسا پارے کہ دا ملک انا شونداری نا ہدف آتا دوئی کننگ کن ننے لاکانودیت آن بچوئی مریک کانود نا بالادستی و اوڑآ عملدرآمد ءِ پک کروئی مریک کرپشن ءِ ماس آن چٹفوئی مریک اوپارے کہ دا ملک انا ہر ادارہ ءِ آئین پاکستان اٹ متعین کروک دنگ انا تہہ ٹی مرسا تینا پبی کڑد ءِ ادا کروئی مریک۔ السی نمائندہ غاتے مرے کہ او لس بندغ نا خیرخواہی و شونہالی کن کانود سازی کیر و نئے بیرہ گچین پالیسی جوڑ کیر بلکن اوفتیا عمل درآمد کن چرجوئی ءِ ہم برقرار تخر ہندا وڑ لس شاری نا ہم زمواری ءِ کہ او ملکی کانود نا پاسداری ءِ کیر و خاص وڑاٹ خراج دُوزی آن پاناد کیر۔ اومستی پارے کہ تدوک آ سال 14 اگست نا دود اٹی نن داہیت انا درشانی ءِ کریسن کہ تینائی گری آن پاناد کینہ۔