اسلام آباد۔ 14 اگست (اے پی پی) اسپیکر قومی اسمبلی راجہ پرویز اشرف پارینے کہ پاکستان سخت خواری و بے مٹ قربانی تیٹی جوڑ مس، ملک خداداد پاکستان نا رکھ ننا غٹ انا زمواری ءِ۔ یک شنبے نادے آ 75 می یوم آزادی آ تینا کلہو اٹی او پارے کہ پاکستان نا ہر شاری آ فرض ءِ کہ دا ملک انا شونداری و شونہالی کن دے ونن کاریم کے، اینو نادے ننے تینا باوہ و پیرہ نا بے مٹ قربانی تا یات ترفک، قائد اعظم محمد علی جناح نا سخت خواری و ننا بزرگ آتا بے مٹ قربانی تا سوب آن اینو نن آجو فضاٹی ساہ ہلنگ ءُ۔ اسپیکر قومی اسمبلی پارے کہ مچ آ قوم دا سال پاکستان نا ڈائمنڈ جوبلی ءِ اڈ تننگ ءِ، قومی اسمبلی ڈائمنڈ جوبلی نا چرجوئی ٹی 10 اگست آن 14 اگست اسکان خصوصی دود آتا بست وبند کرے، ڈائمنڈ جوبلی دود آتیٹی زالبول، چنا، ورنا ومسکوہی پارلیمنٹ نا باسک آتا کنونشن اڈ ہلک۔ اوپارے کہ کنونشن تیٹی زالبول، چنا و مسکوہی و ساڑی پارلیمنٹ نا باسک آک ملک انا ویل آتیا پاش آن پاش تینا خیال آتا درشانی ءِ کریر۔ ڈائمنڈ جوبلی کنونشن اٹی چناک ملک انا معروضی حالیت و ویل آتا ایسری کن شاندار لوز آتیٹی گپ وتران کریر، ننا بروک آ چین اٹی ہمو غٹ لائخی ارے ہرافتے کاریم اٹ اتسا ملک ءِ تنکی تیان کشنگ مریک، ساڑی سیوتی حکومت ملک ءِ مون تروک چیلنج آتون مون تننگ کن پبی گام گیج کننگ ءِ۔ راجہ پرویز اشرف پارے کہ ساڑی حکومت دا غٹ تغ تے پورو کننگ خواہک ہرا ننا باوہ و پیروہ داوطن کن ہراسر، اینو دا قول انا پوسکنی نادے ءِ کہ ننے ملک انا شونداری و شونہالی کن دے و نن کاریم کروئی ءِ۔ اوپارے کہ ملک خداداد پاکستان آ ہراتم ہم سخت وخت بریک ہروڑنا قربانی ایتنہ ، ننا سلہہ بند فوج ملک انا دفاع ءِ سوگو کننگ اٹ بے مٹ قربانی تسنے۔
