اسلام آباد۔ 14 اگست (اے پی پی) وزیراعظم محمد شہباز شریف پارینے کہ پاکستان ننا باوہ و پیرہ نا عظیم قربانی تا بھرم ءِ، قائد اعظم ایمان، سیوت و نظم و ضبط نا تعلیم تس، پاکستان نا جوڑ مننگ نا ولولہ انگیز داستان ننکن کسر ناڈیواءِ، پاکستان اگہ جوہری قوت اس جوڑ مننگ کیک تو زرگزرانی قوت اس ہم جوڑ مننگ کیک، ملک ءِ داوخت آ قومی مکالمہ نا سخت گرج ءِ، ننے امانت و دیانت ءِ تینا شعار جوڑ کروئی مریک۔ داخیال آتا درشانی ءِ او یک شنبے نادے آ پاکستان نا 75 می یوم آزادی نا وخت آ جناح کنونشن سینٹر اٹی بیرک ءِ چست کننگ نا مرکزی دود آن تران اٹی کرے۔ وزیراعظم محمد شہباز شریف بیرک ءِ چست کرے۔ داوخت آ قومی ترانہ ءِ خواننگا۔ دود اٹی چیئرمین سینیٹ صادق سنجرانی، اسپیکر قومی اسمبلی راجہ پرویز اشرف، وزیر خارجہ بلاول بھٹو زرداری ، وزیر حوالکاری وشینکاری مریم اورنگزیب ، وزیر کانود نذیر تارڑ، ریاض پیرزادہ، شاہ زین بگٹی، شیری رحمان، مرتضیٰ جاوید عباسی، مولانا اسعد محمود، خالد مگسی، انجینئر امیر مقام، عسکری سرکڑدہ، پارلیمنٹ نا باسک آک ، درملکی سفارتکار و چندی بشخ آتیان تعلق تخوک آ بندغ آک بھلو کچ اسے ٹی بشخ ہلکر۔ وزیراعظم محمد شہباز شریف تران اٹی پاکستانی تے جشن آزادی نا مبارکبادی ترسا پارے کہ دانعمت آ نن تینا رب انا حضور سجدہ نا شکر اس ادا کینہ۔ او داوخت آ کشمیر و فلسطین نا مسلمان تیکن ہم زوت آن زوت آجوئی نا دعا کرے۔ وزیراعظم ساڑی آ پِر ونوکاپ آن مروک آ جانی نسخان آ است ہسونی نا درشانی و ٹھپی مروک آتا زوت دراخ جوڑی کن دعا کرے۔ اوپارے کہ پاکستان نا جوڑ مننگ نا ولولہ انگیز جہد ننکن کسر نا ڈیوا ءِ مشاہیر پاکستان نا جہد ءِ سلام پیش کینہ ہرافتا جہد آن ننے آجوئی نا نعمت ملا۔ وزیراعظم پارے کہ برصغیر نا مسلمانک جور انا نرزوری اٹ مقابلہ ءِ کریر و تینا مسخت ءِ دوئی کننگ اٹ سرسہبی دوئی کریر، دا مسخت کن سد آ مخلوق تینا جان تا نذرانہءِ پیش کرے، دا جہد اٹی مسلمانک آخا اقلیت آک ہم پبی بشخ ہلکر۔ اوپارے کہ نن پاکستان نا شونداری و شونہالی ٹی پردیسی تا اہم کڑد انا ہم ستاءِ کینہ ۔ وزیراعظم محمد شہباز شریف پارے کہ پاکستان دنی انا ہفت می جوہری واک ءِ و دا پروگرام تون گنڈوک غٹ ادارہ غاک و بندغ آک نن محسن ءُ۔ اوپارے کہ ننے تینا محاسبہ ءِ کروئی مریک، داڑکن قومی مکالمہ نا گرج ءِ ہراڑکن میثاق معیشت منگ کیک، نن جوہری قوت اس جوڑ مننگ کینہ تو زرگزرانی قوت اس انت اکن جوڑ مننگ کپن۔ وزیراعظم پارے کہ دا آجوئی بھلو قربانی تیان دوئی مس۔ دانا دترنا آخیریکو پڑی اسکان دفاع ءِ کینہ۔ اونا پاننگ ئس کہ ورناک دا ملک انا میرات ءُ واوفتے ملک ءِ مون آ دروئی ءِ، ورناک ننا اولیت آتا اہم جزو ءُ۔ وزیراعظم پارے کہ دنیا ٹی ہنوک آ ہند ءِ دوئی کننگ کن بریر نن غٹ اسٹ مرین۔ پاکستان ءِ جوڑ کننگ نا ارٹ میکو مسخت ءِ ننے غٹ ءِ اواری اٹ پورو کروئی ءِ۔ اوقومی ترانہ ءِ دُوارہ ریکارڈ کننگ آ تعلقدار ادارہ غاتے مبارکبادی تس۔ داوخت آملی نغمہ ہم پیش کننگا، فنکار آک صوبائی زبان تا لوک گیت آتا دھن آ پرفارمنس ہم تسر۔
