اسلام آباد۔ 14 اگست (اے پی پی) وزیراعظم محمد شہباز شریف پارینے کہ 75 می جشن آزادی ءِ اڈتننگ نا وخت آ ننےپاکستان نا جوڑ کروک آتا نظریہ غاتیان راہشونی ہلسا قومی تعمیر نو کن مخلوق نا آسودہی ءِ تینا اولیت جوڑ کروئی مریک، 75 می یوم آزادی مچ آ پاکستانی قوم اکن اسہ تاریخی ءُ دے اسے۔ اینو نادے آ مچ آ قوم، برصغیر نا مسلمان تے مملکت خداداد پاکستان نا جوڑ کننگ کن بے مٹ جہد آ خراج تحسین و بے مٹ قربانی تیا نظرانہ عقیدت پیش کیک۔ یوم آزادی نا وخت آ تینا کلہو اٹی اوپارے کہ پاکستان نا جوڑ کننگ بابائے قوم ، قائد اعظم محمد علی جناح نا مسخت کن لگن، عزم صمیم ، سخت خواری و جہد نا سوب آن ممکن مس، 1930 اٹی تصور پاکستان پیش مننگ آن پد بیرہ 17 سل انا گونڈ ءُ مد اسے ٹی پاکستان دنیا نا نقشہ غا غٹ آن بھلا اسلامی مملکت نا وڑاٹ جوڑ مس۔ اوپارے کہ پاکستان نا جوڑ کننگ معجزہ سے آن کم الوکہ ہرادوست ودشمن غٹ ءِ نئے بیرہ حیرت اٹ شاغا بلکن غٹ تر قیاس آرائی و پیش گوئی تیان چپ دنیا ٹی تینا انفرادی حیثیت ءِ برجاتخا۔ اوپارے کہ ہراڑے ہفتاد ءُ پنچ می یوم آزادی بے پناہ خوشی و جشن انا سوب ءِہموڑے دا اجتماعی و انفرادی کہول آ خوداحتسابی نا ہم اسہ موقع اسے۔ بطور قوم نن ہفت ءُ نیم دہائی تیٹی سرسہبی تا بھلو مزل نانشان اسے عبور کرینن، ننا سالمیت آ پیشن نا جلہو آتا پبی ورندی آن ہلیس اسہ امنائی قومی آئین اسے نا جوڑ کننگ، دنیا نا ہفت می نیوکلیئر واک و دہشت گردی تون مقابلہ کرسا اجتماعی وڑاٹ اودے شکست تننگ اسکان نن تینا پدریسہ جہد آن دا ملک انا نئے بیرہ رکھ ءِ کرسا بسونن بلکن دے و نن اونا شونداری و شونہالی ٹی لگوک مسونن۔ اولیکو دے آن دا ملک ءِ مشکل آتا مون تروک ئسک ولے ننا نرزور قوم انا جوزہ نا مون آ غٹ مشکل آک شیف تمار۔ اوپارے کہ ولے داہم اسہ مسلمہ حقیقت اسے کہ راجی و زرگزرانی بریبری، کانود ناحکمرانی و بریبری آ مبنی ہرا مملکت خداد نا تغ ءِ ننا باوہ و پیرہ غاک خناسر نن اودے داسکان پورو وڑاٹ پورو کننگ کتنونن۔ اوپارے کہ نن اینو اسہ آجو ملک اسے ٹی ساہ ہلنگ اُن، ہراڑکن نن رب بزرگ و برتر نا اخس ہم شکر ءِ ادا کین کم ءِ، ولے حقی آجوئی گرج، بین، افلاس وپسماندگی آن آجوئی نا پن ءِ ہراتم اسکان نن زرگزرانی وڑاٹ اسہ وتواجہ ریاست اس جوڑ مفنہ ہموتم اسکان پورو آجوئی نا دا تغ حقیت جوڑ مننگ آن محروم سلک۔ اوپارے کہ ہرقوم اکن تہہ نا خلفشار، تین پہ تینی بشخنگ و بے چیٹی آن ود اسہ گڑاس ہم خطرناک مننگ کپک، انتئے کہ داوڑنا منفی زموار آک نئے بیرہ ملی وحدت و قومی سالمیت ءِ نسخان ایترہ بلکن راج ءِ اونا مسخت آن محروم کیرہ۔ قائد اعظم ءِ دا سوب آتا جوانی اٹ درک ئسک، ہنداخاطرآن او ننے اوفتا توننگ کن ایمان سیوت و نظم و ضبط نا سبخ ءِ خوانفے۔ اوپارے کہ ننا ملک انا غٹ آن بھلا واک ننا مخلوق، خاص وڑاٹ لائخ آ ورناک ءُ، اوفتا لگن، ہمت و تعمیری توانائی تیان پُر جوزہ ہروڑنا مشکل ءِ عبور کرسا اومیت نا شمع ءِ لگفنگ نا لائخی تخک۔
