پاکستان ءِ 75 می آجوہی ءِ روچءَ را سرجمیں جوشء ُ جزبگ  ءَ گوں  گوازیناں، پی ٹی آئی رہشون ملک حمزہ خان ناصر

کوئٹہ۔12اگست  (اے پی پی):پاکستان تحریک انصاف  ءِ صوبائی رہشون ملک حمزہ خان ناصر ءَ  گشتگ کہ پاکستان ءِ 75 می آجوہی ءِ روچءَ را  گوں سرجمیں  جوشء ُ جزبگ ءَ گوازیناں، مار ااے موہ ءَ اے جزم ءِ درشانی کنگ لوٹ ایت کہ ملک پاکستان ءِ  سلامتی ءِ ھاترءَ ہرچ وڑیں قربانی ءَ دیاں۔ اے ھیالانی درشانی آئی ءَ جمعہ ءِ روچءَ’’اے پی پی ‘‘ ء َ گوں گپء ُتران کنان ءَ کتگ۔ آئی ءَ گشتگ کہ 14 اگست ءِ روچ نوکیں جزمے ءِ روچ اِنت مارا یک آزاتیں وطن اسلامی جمہوریہ پاکستان کہ رستگ اللہ پاک ءِ نعمت اِنت ، اے ملک ءِ دیمروئی ء ُ رکینگ ء ُ وشھالی ءِ ھاترءَ زند ءِ ہمک تک ء ُ پناتاں چہ سیادی داروکیں مردماناں وتی کردءَ پیلو کنگ  لوٹ ایت، بلوچستان ءِ  اُلس وطن دوست اَنت ء ُ اُلس 75 می  آجوہی ءِ روچءَ را گوں جوش ء ُ جزبگ ءَ گوازیناں، آجوہی ءِ روچءِ  موہ ءَ سرجمیں بلوچستان ءَ پی ٹی آئی  ءِ چیرستی ءَ روانک  در کنگ بیت ء ُ گوں ملک ءَ محبت ءِ درشانی کنگ بیت۔ آئی ءَ گشتگ کہ ماتیں وطن  پاکستان ءِ بن اِشت ءِ تہا  لکھاں شہید آنی ھون ہوار اَنت، ملک ءِ دیمپانی ءِ ھاترءَ اُلس پاک فوج ءِ  گوما ہم کوپگ اِنت اگاں کجام ہم دژمن  پاکستان ءَ را ترندیں چماں بہ چاریت پاکستانی اُلس گوں  پاک فوج ءَ گوں یکجاہ آیاناں ترندیں پسو دنت۔