پاکستان و ترکی نا نیام اٹ  واپار و زرکاری ءِ ودفنگ نا بھلو وارخواہی اس ساڑی ءِ، واپار نا معاہدہ غان ہڑتوم آ ملک آتیکن پوسکن ءُ کسر ملنگک، وزیراعظم شہباز شریف

اسلام آباد۔ 12 اگست (اے پی پی) وزیراعظم شہباز شریف پارینے کہ پاکستان و ترکی نا نیام اٹ واپار و زرکاری ءِ ودفنگ نا بھلو وارخواہی اس ساڑی ءِ، مصنوعات نا واپار نا معاہدہ غان ہڑتوم آ ملک آتیکن پوسکن ءُ کسر ملنگک، ہڑتوم آ کنڈآتا واپار نا مون آ دننگ کن معاہدہ غا پورو وڑاٹ عملدرآمد ءِ پک کننگک۔ اوداخیال آتا درشانی ءِ جمعہ نادے آ داڑے پاکستان و ترکی نا نیام اٹ واپاری معاہدہ غا دستخط غاتا دود آن تران کرسا کرے۔ معاہدہ غا بنجائی وزیر واپار سید نوید قمر و ترکی نا وزیر واپار مہمت مش دستخط کریر۔ دود اٹی بنجائی وزیر خزانہ مفتاح اسماعیل ، بنجائی وزیر حوالکاری و شینکاری مریم اورنگزیب ، بنجائی وزیر چاگڑدی بدلی شیری رحمان، بنجائی وزیر زرکاری بورڈ چوہدری سالک حسین و بڑزکو سرکاری آفیسر آک ہم ساڑی ئسر۔ وزیراعظم پارے کہ پاکستان  و ترکی نا تاریخی برادرانہ تعلقداری ٹی دا معاہدہ اسہ مزل نا نشان اسے نا حیثیت تخک۔ ہڑتوم آ ملک آتا نیام اٹ واپاری معاہدہ ستاکڑزک۔ داڑآ کیہی سال تیان گپ وتران مننگ ءِ۔ مئی ٹی ننا ترکی نا دورہ غان پد پاکستان و ترکی نا کنڈآن معاہدہ کن کوشست آتے ترند کننگا۔ ترکی نا صدر رجب طیب اردوان نا بے مٹ خواری کرینے اوکان پد دا معاہد طے مسنے۔ اوپارے کہ پاکستان و ترکی نا نیام اٹ واپار نا مون آ دننگ نا بھلو  گنجائشت و لائخی ساڑی ءِ و واپار نا مون آ دننگ کن نن پبی عزم تخک۔ دا معاہدہ غان ہڑتوم آ ملک آتا تعلقداری تے سوگو جوڑ کننگ کن پوسکن ءُ کسر ملک و واپار و زرکاری ءِ ودفنگ اٹ کمک رسینگک۔ ننے دا معاہدہ غا پورو وڑاٹ عملدرآمد ءِ پک کننگ ءِ۔ دود آن تران کرسا وزیر واپار سید نوید قمر پارے کہ پاکستان و ترکی نا نیام اٹ معاہدہ نا رداٹ ہڑتوم آ ملک آک تینا تینا مصنوعات آتا واپار کننگ کیرہ و داڑآن ہڑتوم آ ملک آتا زرگزران سوگو مریک۔ پاکستان و ترکی واپار کن چندی گڑاتیا اسہ ایلو ءِ رعایت تسنو۔ نن تینا ہڑتوم آ کنڈآتا واپار نا کچ ءِ 5 ارب ڈالر اسکان ودفنگ نا خواہندار اُن۔ دامعاہدہ غان ننے تینا ہدف آتے دوئی کننگ اٹ کمک رسینگک و ہڑتوم آ ملک آتا کاروباری تپہ غاک ہم داڑآن فائدہ ہرفنگ کیرہ۔ ترکی نا وزیر واپار مہمت مش پارے کہ پاکستان ترکی ءِ بھلو وخت اسے آن اسیجائی واپار نا مون آ دننگ نا دامعاہدہ نا گرج ئسک۔ مئی ٹی وزیراعظم شہباز شریف نا ترکی نا دورہ ٹی داڑآ کاریم ءِ ترند کننگ آ امنا کننگا۔ دامعاہدہ غان نن تینا ہڑتوم آ کنڈآتا واپار ءِ 5 ارب ڈالر اسکان ودفنگ کینہ۔ واپار نا مون آ دننگ اسہ پدریسہ ءُ عمل اسے ہراڑکن ننے اواری اٹ چیلنج آتا مون ءِ توروئی ءِ۔