صدر مملکت نا فاطمہ جناح انسٹیٹیوٹ آف ڈینٹل سائنسز نا دورہ، ہسپتال اٹی برجا تعمیراتی کاریم تا جاچ ءِ ہلک

لاہور۔ 12 اگست (اے پی پی) صدر مملکت عارف علوی جمعہ نادے آ فاطمہ جناح انسٹیٹیوٹ آف ڈینٹل سائنسز لاہور نا دورہ ءِ کرے و ہسپتال اٹی برجا تعمیراتی کاریم تا جاچ ءِ ہلک۔ داوخت آ وزیراعلیٰ پنجاب چوہدری پرویز الٰہی ہم اوڑتون اوار ئسک۔ صوبائی وزیر جان جوڑی ڈاکٹر یاسمین راشد و ہسپتال نا پروجیکٹ ڈائریکٹر پروفیسر ڈاکٹر وحید صدر مملکت و وزیراعلیٰ پنجاب ءِ جم و جوش اٹ بخیر کریر۔ ڈاکٹر یاسمین راشد صدر مملکت عارف علوی و وزیراعلیٰ پنجاب چوہدری پرویز الٰہی ءِ ہسپتال اٹی برجا تعمیراتی کاریم تا بابت حوال تس۔ اوپارے کہ دا پروجیکٹ کن 100 کنال آ تالان ڈینٹل ہسپتال کن 2005 اٹی ڈغار ہلنگا۔ پروجیکٹ ڈائریکٹر پروفیسر وحید پارے کہ ہسپتال نا تعمیراتی کاریم نا بنا2010 اٹی مس۔ اوپارے کہ داوخت آ دا پروجیکٹ نا خڑچ انا کساس 347.358ملین خلنگاسس وخت اس کہ 30 جون 2022 اسکان دا ڈٹ آ 673.390 ملین خڑچ کننگانے۔ پروفیسر ڈاکٹر وحید پارے کہ تھری ڈی ہسپتال پوسکن آ ازباب و آسراتی تیان آراستہ مریک و اودے بھاز زوت پورو کننگک۔ داوخت آ صدر مملکت عارف علوی پارے کہ ہسپتال اٹی برجا تعمیراتی کاریم تے زوت پورو کننگے تانکہ الس دا پوسکن آ تھری ڈی ہسپتال نا آسراتی تیان فائدہ ہرفنگ کے۔