چیئرمین سینیٹ محمد صادق سنجرانی نا برازیل نا سفیر تون اوڑدہی ٹی گپ وتران

اسلام آباد۔ 12 اگست (اے پی پی) چیئرمین سینیٹ محمد صادق سنجرانی پارینے کہ برازیل سویلی امریکہ ٹی پاکستان نا اہم واپاری شریدارءِ ، ہڑتوم آ ملک آتا نیام اٹ بڑزکو کہول انا ہن و بر ءِ مون آ دننگ آن ہڑتوم آ ملک آتا تعلقداری پین سوگو مریک۔ سینیٹ سیکرٹریٹ نا رداٹ داخیال آتا درشانی ءِ او پاکستان اٹ برازیل نا سفیر اولنتھووئیر اتون  گپ وتران کرسا کرے ہرا جمعہ نادے آ اوڑتون پارلیمنٹ ہاؤس اٹی اوڑدہی کرے۔ اوڑدہی ٹی ہڑتوم آ کنڈآتا تعلقداری تتون اوار تین پہ تینی است خواہی نا امور آ گپ وتران کننگا۔ چیئرمین سینیٹ برازیلین سفیر تون اونا اُرائی نا کزیت آ ہڑزخواہی کرے۔ اوڑدہی ٹی ہڑتوم آ کنڈآتا تعلقداری تے پین مون آ دننگ نا بابت گپ وتران کننگا۔ چیئرمین سینیٹ صادق سنجرانی پارے کہ پاکستان و برازیل نا نیام اٹ کڑمب و سوگو تعلقداری ءِ ، ہڑتوم آ ملک آتا نیام اٹ واپاری تعلقداری و کثیر جہتی فورم تیا گچین کمکاری ستاکڑزک، برازیل تون سیاسی، اقتصادی و دفاع تون اوار غٹ بشخ آتیٹی ہڑتوم آ کنڈآتا تعلقداری تے پین مون آ دننگ خواہک۔ اوپارے کہ پارلیمانی فرینڈ شپ گروپس، گپ وتران نا کمک اٹ ہڑتوم آ ملک آتا نیام اٹ السی رابطہ غاتے سوگو کننگ اٹ اہم ءُ کڑد اس ادا کننگ کینہ۔ ہڑتوم آ ملک آتا نیام اٹ بڑزکو کہول انا ہن و بر ءِ مون آ دننگ آن ہڑتوم آ ملک آتا تعلقداری پین سوگو مریک۔ اوپارے کہ برازیل سویلی امریکہ ٹی پاکستان نا اہم واپاری شریدار ءِ ، ہڑتوم آ ملک آتا نیام اٹ ہڑتوم آ کنڈآتا واپار نا کچ کم و ود 1.3 بلین امریکی ڈالر نا لگ بھگ ءِ ہرادے پین ودفنگ مریک۔ ڈیری، بیف و پولٹری ، حلال سیکٹر، فارماسیوٹیکل، کشت وکشار و آئی ٹی نا بشخ آتیٹی برازیل کن زرکاری نا وارخواہی ساڑی ءِ۔ چیئرمین سینیٹ پارے کہ پاکستان کشت وکشار و تکنیکی بشخ آتیٹی برازیل آن فائدہ ہرفنگ نا خواہندار ءِ۔ پاکستان نا واپاری نظام و اسہ بھلو صارف منڈی اس برازیل نا پوریاگرآتیکن گچین اقتصادی وارخواہی فراوان کیک ہراڑآن اوبایدے فائدہ ہرفے۔ اوڑدہی ٹی اسہ ایلو نا دودوربیدگ ءِ پہہ مننگ کن السی رابطہ غاتے ودفنگ و ڈل آتا ہن و بر نا گرج آ زور شاغنگا۔