تحریک پاکستان نا جہد اٹی زالبول آتا کڑد ستاکڑزک، اسپیکر قومی اسمبلی راجہ پرویز اشرف

اسلام آباد۔ 12 اگست (اے پی پی) اسپیکر قومی اسمبلی راجہ پرویز اشرف پارینے کہ پاکستان نا یوم آزادی ننے باوہ پیرہ نا قربانی تا یات ترفک، تحریک پاکستان نا جہد اٹی گودی فاطمہ جناح و بیگم رعنا لیاقت علی خان تون اوار ایلو زالبول آتا کڑد ستاکڑزک۔ جمعہ نادے آ قومی اسمبلی ہال اٹی ڈائمنڈ جوبلی دود آتا بابت اڈ ہلوک زالبول پارلیمنٹ نا باسک و ایلو زند انا بشخ آتیان تعلق تخوک آ زالبول آتا کنونشن نا وخت آ تران کرسا اوپارے کہ ای اینو ’’ڈائمنڈ جوبلی کنونشن آف ویمن پارلیمنٹرینز ‘‘ پروگرام نا بشخ مرسا خوشی محسوس کننگ اٹی اُٹ، بلاشبہ پاکستان نا یوم آزادی ، ننا اجداد نا کنڈآن تروک آ قربانی و تحریک آجوئی کن کروک آ جہد نا یات ترفک، دااسہ حقیقت اسے کہ ننا پاکستانی مسنک و ایڑھک، برصغیر نا زالبول راہشون آتا نقش قدم آ چلینگسا پاکستان اٹی زالبول آتا حق انا مون آ دننگ و قومی باندات آتیٹی اوفتا بشخ ہلنگ ءِ ودفنگ کن قابل ذکر خذمت سرتسنے۔ ویمنز پارلیمنٹری کوکس، پارلیمانی عمل اٹ زالبول آتا اواری ءِ ودفنگ کن قابل تحسین گام گیج کننگ ءِ، اجتماعی کوشست آتا رداٹ ویمنز پارلیمنٹری کاکس صنفی اڑاند آتے چٹفنگ ءِ  و کانودی فریم ورک اٹ اصطلاحات اتنگ ءِ۔ راجہ پرویز اشرف پارے کہ ای تکیوہ کہ اینو نا زالبول آک، نرینہ غاتون ہم کوپہ چلینگسا راجی و زرگزران شونداری ٹی پبی کڑد ادا کننگ کیرہ، اوسیکرٹری ویمنز پارلیمنٹری کاکس باسک قومی اسمبلی گودی شاہدہ رحمانی صاحبہ ءِزالبول پارلیمانی باسک آتیکن اسہ سوگو و واکدار پلیٹ فارم اس تننگ آ مبارکباد پیش کرے۔