آزادی بھلو نعمت اسے، ملک ءِ شونداری و شونہالی نا مزل آن ہمکنار کننگ کن قومی یکجہتی و امنائی سلاہ نا درشانی ءِ کننگک، زالبول باسک پارلیمان

اسلام آباد۔ 12 اگست (اے پی پی) پارلیمان نا زالبول باسک آک لمہ وطن نا ڈائمنڈ جوبلی دود آتے شایان شان وڑاٹ اڈتننگ نا اہمیت ءِ تالان کرسا پارینو کہ آزادی بھلو نعمت اسے ، ملک ءِ مون تروک حالیت آتا خواست ءِ کہ قومی زرگزران نا سوگوی و ملک ءِ شونداری و شونہالی نا مزل آن ہمکنار کننگ کن سیاسی اختلاف آتے ایڑتر تخسا قومی یکجہتی و امنائی سلاہ نا درشانی ءِ کننگے۔ داخیال آتا درشانی ءِ اوفک ڈائمنڈ جوبلی نا رداٹ اے پی پی تون خصوصی گپ وتران کرسا کریر۔ پاکستان مسلم لیگ (ن) نا باسک قومی اسمبلی روبینہ خورشید پارے کہ ننے غٹ  اللہ تعالیٰ نا شکر ءِ ادا کین کہ نن آجو فضاتیٹی ساہ ہلنگ اُن۔ اوفک پاریر کہ پارلیمنٹ اٹی ’’پاک سرزمین شادباد ‘‘ نا سرحال آن دود آک برجا ءُ ہراٹی غٹ پارلیمنٹ نا باسک آک پبی وڑاٹ بشخ ہلنگ ءُ۔ اوفک پاریر کہ نن دا قول کرینن کہ نن پاک سرزمین ءِ حقی وڑاٹ آسودہی ریاست اس جوڑ کرسا دم کشنہ۔ اوفک پاریر کہ دود آتیٹی طالب علم آتون اوار غٹ بشخ آتیان تعلق تخوک آ بندغ آک پبی بشخ ہلنگ ءُ ہرا ستاکڑزک۔ جمعیت علمائے اسلام (ف) نا قومی اسمبلی نا باسک شاہدہ اختر علی پارے کہ آجوئی بھلو نعمت اسے ، پاکستان اٹی جمہوری نظام ءِ ہراٹی الس نا اہمیت دوئی ءِ۔ اوپارے کہ ننا باوہ پیرہ قربانی ترسا دا ملک ءِ دوئی کریر۔ نن غٹ سیاسی اختلاف آتے ایڑتر تخسا زیات آن زیات آجوئی نا خوشی تے اڈایتن۔ پیپلزپارٹی نا سینیٹر کرشناکماری پارے کہ یوم آزادی ءِ نن ہر سال جم وجوش اٹ اڈایتنہ، دا وار ملک انا گیشتر بشخ آتیٹی مخلوق ءِ نوکاپ نا سوب آن مشکل مون تروک ءِ ، وخت انا خواست ءِ کہ مشکل آتیٹی اختہ تینا ایڑھ ایلم تا پبی کمک ءِ کین۔ مسلم لیگ (ن) نا قومی اسمبلی نا باسک طاہرہ اورنگزیب پارے کہ پاکستان ءِ نواز شریف و ذوالفقار علی بھٹو ایٹمی واکدار جوڑ کرینو ، مسکوہی وزیراعظم محمد نواز شریف نا دور اقتدارآن پد پاکستان اٹی ہراحالیت آک گدرینگانو دعا ءِ کہ بروک آ وخت آتیٹی پاکستان داوڑنا حالیت آتے خنپ و شونداری و شونہالی آن ہمکنار مرے۔ جے یو آئی (ف) نا قومی اسمبلی نا باسک عالیہ کامران پارے کہ قوم ءِ یوم آزادی نا وخت آ دا کلہو ءِ کہ قوم یکجا مرے انتئے کہ اینو پگہ ہراحالیت آک چلینگ انگ ءُ او بھاز مشکل ءُ و دامشکل حالیت آتیٹی ہم الس مدام ملک اتون تفینے ہراڑآ قوم ءِ سلام پیش کینہ۔ اودعاکرے کہ اللہ تعالیٰ ملک انا زرگزران ءِ سوگو کے و پاکستان کن آسانی ودی کے۔