14 اگست قول ءِ پوسکنی نا دے ءِ، ملکی سوگوی و شونداری کن پوریاگر برادری غٹ تپہ غاتون ہم کوپہ ءِ، خواجہ شاہد رزاق سکا

فیصل آباد۔ 12 اگست (اے پی پی) تنظیم تاجران پاکستان نا سرپرست اعلیٰ ، انجمن تاجران سٹی فیصل آباد نا صدر و پنی آ صنعتی شخصیت خواجہ شاہد رزاق سکا پارینے کہ 14 اگست نا دے ننا آجوئی نادے ءِ ہرا ننا بزرگ آتا بے مٹ قربانی تیان پد آجو ملک اسے نا حیثیت اٹ دنیا نا نقشہ غا مون آ بس وخت اس کہ دا ملک ننے اخلاقیات، اخوت و یگانگت ، امن تون اوار اوار وطن تون مہرو مریبت نا درشانی نا درس ایتک، یوم آزادی آ ننے قول ءِ پوسکن کروئی مریک کہ نن جہانی حالیت آتا رداٹ اسہ ایلو نا غٹ سیاسی، فروعی، لسانی، علاقائی اختلاف آتے چٹفسا پاکستان ءِ قائد اعظم نا تغ تا تعبیر جوڑ کرسا حقی وڑاٹ آسودہی، السی و شونہال ریاست اس جوڑ کینہ۔ اے پی پی تون گپ وتران اٹی پارے کہ آزادی نا قدر ءِ ہمو ملک و علاقہ غاتا الس آن اَریفنگے ہرا غلامی ٹی ساہدار تیان ہم بدتر زند ءِ تیر کننگ ءُ۔ اوپارے کہ بابائے قوم ہرا مسخت آتیکن دا جتا ڈیہہ نا ڈغار ءِ دوئی کرے اینو نن اوڑآن بھاز مر پیش تمانن۔ اوپارے کہ اسلامی جمہوریہ نا پن انا مسخت ہی دادے کہ دا وطن ءِ پورو اسلامی ضابطہ حیات نا رداٹ جمہوریت نا پٹڑی آ راہی رواں تخنگک ہراٹی ہر شاری ءِ پورو بنداوی آسراتی دوئی مریک و ملک ءِ حقی وڑاٹ آسودہی ریاست اس جوڑ کننگک۔