حکومت اقلیت آتا حق انا رکھ، راجی آسراتی کن غٹ تر کوشست آتے کیک، صدر ڈاکٹر عارف علوی نا اقلیت آتا قومی دے انا وخت آ کلہو

اسلام آباد۔ 11 اگست (اے پی پی) صدر مملکت ڈاکٹر عارف علوی پاکستان نا شونداری ٹی اقلیت آتا خذمت آتا ستاءِ کرسا پارینے کہ حکومت اوفتا حق انا رکھ و راجی آسراتی کن غٹ تر کوشست آتے کیک۔ 11 اگست 2022 آ اقلیت آتا دے انا وخت آ تینا کلہو اٹی صدر مملکت پارے کہ 11 اگست پاکستان اٹی اقلیت آتا دے انا وڑاٹ اڈتننگک تانکہ پاکستان نا شونداری ٹی ننا اقلیت آتا شریداری  ءِ امنا کننگ مرے و بطور قوم اوفتا حق انا رکھ اکن ننا عزم انا درشانی ءِ کننگ مرے۔ اوپارے کہ دادے ننے بابائے قوم قائد اعظم محمد علی جناح نا 1948 اٹی کروک آ ہمو قول ءِ یات ترفک کہ دا عظیم قوم انا ہر بندغ ءِ اونا مذہبی عقیدہ غاتا قطع نظر بریبر حق و آجوئی دوئی مریک۔ دا ہرسا خوشی مریک کہ پاکستان اٹی اقلیت آک زند انا غٹ بشخ آتیٹی فعال کڑد ادا کننگ ءُ و پاکستان اٹی اوفتا تینا مذہب آ عمل کننگ نا حق انا رکھ ءِ کننگانے۔ اوفتا حق ننا آئین اٹی نوشتہ ءِ۔ اسلام اقلیت آتا حق انا رکھ آ ہم زور شاغک۔ صدر مملکت پارے کہ حکومت پاکستان ملک اٹی اقلیت آتا آسراتی کن پدریسہ کوشست کننگ ءِ۔ بنجائی و صوبائی اسمبلی تیٹی اووفتا نمائندگی ءِ۔ داکان بیدس اوفتے غٹ سرکاری خذمت آتیٹی ملازمت نا کوٹہ ہم جتا کننگانے۔ ہنداوڑ دا حکومت کن اسہ سمت اس متعین کیک کہ او تینا پالیسی تے ہمہ جہت راجی و اقتصادی شونداری نا مسخت نا دوئی کننگ و قوم انا غٹ برادری تیکن بریبری نا میدان فراوان کننگ کن شین ایتے۔ صدر مملکت خاص وڑاٹ تعلیم ، جان جوڑی و راجی آسراتی نا بشخ آتیٹی اقلیت آتا کڑد انا ستاءِ کرسا پارے کہ پاکستان بنداوی حق و پالیسی نا اصول آتا کمک اٹ آئین اٹی نوشتہ تینا زمواری آتیا سلوک ءِ۔ اوپارے کہ حقیقت اٹ پاکستان اٹ اقلیت آک ننا راجی و قومی پنجر نا اسہ اٹوٹ ءُ بشخ اسے ءُ و دادے اٹی غٹ اقلیتی برادری تے باور کرفیوہ کہ حکومت اوفتا حق انا رکھ و اوفتا راجی آسراتی کن غٹ تر کوشست آتے کیک۔ صدر مملکت پارے کہ سوگو و شونہال پاکستان کن اسہ ایلو تون مہرومریبت ، ایلمی و سیوت نا جوزہ ءِ مون آ دننگ ننا اسیجائی زمواری ءِ۔