پاکستان و ٹوگو نا نیام اٹ جان جوڑی، انسداد دہشت گردی ، دفاع و کشت وکشار نا بشخ آتیٹی ہڑتوم آ کنڈآتا کمکاری ءِ ودفنگ نا گرج ءِ ، چیئرمین سینیٹ محمد صادق سنجرانی

اسلام آباد۔ 11 اگست (اے پی پی) چیئرمین سینیٹ محمد صادق سنجرانی پارینے کہ پاکستان و ٹوگو نا نیام اٹ جان جوڑی ، انسداد دہشت گردی ، دفاع و کشت وکشار نا بشخ آتیٹی ہڑتوم آ کنڈآتا کمکاری ءِ ودفنگ نا گرج ءِ۔ سینیٹ سیکرٹریٹ نا رداٹ داخیال آتا درشانی ءِ او ٹوگو نا وزیر خارجہ پروفیسر رابرٹ ڈوسے تون گپ وتران کرسا کرے ہرا پنچ شنبے نادے آ اوڑتون پارلیمنٹ ہاؤس اٹی اوڑدہی کرے۔ اوڑدہی ٹی ہڑتوم آکنڈآتا تعلقداری تے پین مون آ دننگ نا بابت سرجم گپ وتران کننگا۔ محمد صادق سنجرانی مارچ 2022 اٹی اسلام آباد اٹی مروک آ او آئی سی سی ایف ایم کانفرنس اٹی ٹوگو نا وزیر خارجہ نا اوار مننگ نا ستاءِ کرے۔ چیئرمین سینیٹ اوڑدہی ٹی اسیجائی قدر، و تین پہ تینی شرف آ مبنی ہڑتوم آ کنڈآتا تعلقداری تا اہمیت ءِ تالان کرے۔ اوہڑتوم آ ملک آتا نیام اٹ روایتی ہم آہنگی و جہانی امور آ تین پہ تینی کمکاری نا ستاءِ کرے۔ محمد صادق سنجرانی پارے کہ علاقائی و جہانی تنظیم بشمول او آئی سی ، اے یو، یو این و ایکوواس اٹی ٹوگو نا کمکاری ستاکڑزک۔ اوڑدہی ٹی ہڑتوم آ کنڈآتا سیاسی، واپاری و دفاعی تبادلہ غاتا مون آ دننگ وہڑتوم آ کنڈآتا واپار ءِ پین مون آ دننگ آ زور شاغنگا۔ چیئرمین سینیٹ ٹوگو نا وزیر خارجہ ءِ مشترکہ بزنس کونسل نا جوڑ کننگ نا سلاہ تس۔ اوپارے کہ جان جوڑی، انسداد دہشت گردی، دفاع و کشت وکشار نا بشخ آتیٹی ہڑتوم آ کنڈآتا کمکاری ءِ ودفنگ نا گرج ءِ۔ داوخت آ ٹوگو نا وزیر خارجہ ہڑتوم آ کنڈآتا کمکاری ءِ پین مون آ دننگ نا باوری کرفے۔ او ڈیہہ ٹی امن کن پاکستان نا کوشست آتا ستاءِ کرسا پارے کہ دا ڈیہہ نا اہم ءُ ملک اسے و نن اوڑتون تعلقداری تے مون آ دننگ نا خواہندار ءِ۔ چیئرمین سینیٹ ڈل ءِ بڑزکو ایوان و کانود سازی نا کاریم نا وڑوڈول نا بارواٹ معلومدار کرے۔ اوڑدہی ٹی ادارہ جاتی کمکاری ءِ مون آ دننگ آ امنا کننگا۔ چیئرمین سینیٹ پارے کہ پاکستان نا ادارہ پارلیمانی خذمت ٹوگو نا پارلیمان نا اسٹاف وپارلیمنٹ نا باسک آتیکن کمک فراوان کننگ کیک، پارلیمانی کاریم نا کچ ءِ ودفنگ آن گچین کانود سازی و پالیسی سازی ٹی کمک ملک، گچین رابطہ کاری و السی کہول آ رابطہ غاتے ودفنگ کن پارلیمانی سفارتکاری ءِ مون آ دننگ نا گرج ءِ۔ اوڑدہی ٹی سینیٹر نصیب اللہ بازئی، ذیشان خانزادہ ، فدامحمد و سیکرٹری سینیٹ قاسم صمد خان ئسک ہم ساڑی ئسر۔