جموں وکشمیر جھیڑہ، ایف اے ٹی ایف آ چین نا مخ تفی نا ستاءِ کینہ، سی پیک نا مخالف آک سرسہب مفسہ، چیئرمین سینیٹ

اسلام آباد۔ 11 اگست (اے پی پی) چیئرمین سینیٹ محمد صادق سنجرانی پارینے کہ پاکستان نا بنداوی قومی فائدہ غاتا امور، جموں وکشمیر نا جھیڑہ و ایف اے ٹی ایف آ چین نا مخ تفی نا ستاءِ کینہ، پاک چین اقتصادی راہداری نا مخالف آک سرسہب مفسہ، پاکستان اٹی چندی ڈٹ آتیا کاریم کروک آ چینی شاری تا رکھ پاکستان نا اولیت ءِ۔ سینیٹ سیکرٹریٹ نا رداٹ داخیال آتا درشانی ءِ او پاکستان اٹی چین نا سفیر نونگ رونگ تون گپ وتران کرسا کرے ہرا پنچ شنبے نادے آ پارلیمنٹ ہاؤس اٹی اوڑتون اوڑدہی کرے۔ اوڑدہی ٹی ہڑتوم آ کنڈآتا تعلقداری تون اوار تین پہ تینی است خواہی نا امور آ گپ وتران وخت اس کہ پاکستان و چین نا تین پہ تینی فائدہ غاتیکن چندی بشخ آتیٹی ہڑتوم آ کنڈآتا کمکاری ءِ پین مون آ دننگ نا عزم انا درشانی ءِ کننگا۔ اوڑدہی ٹی ہڑتوم آ ملک آتا ڈیہہ ٹی امن، شونہالی و شونداری نا مون آ دننگ کن اجتماعی کوشست آتا گرج آ زور شاغنگا۔ چیئرمین سینیٹ صادق سنجرانی پارے کہ ’’اسٹریٹجک کمکاری شریداری‘‘ پاک چین تعلقداری تے پوسکن آ بڑزی تیا دیک۔ ہڑتوم آ حقی سنگت ہروڑناحالیت آتیٹی اسہ ایلو تون سلیسنو۔ اوپارے کہ پاکستان چین نا قومی فائدہ غاتا بنداوی امور’’ون چائنا پالیسی‘‘ ، تائیوان ، تبت، ہانگ کانگ و بحیرہ سویلی چین آ چین نا مخ تفی ءِ کیک۔ چیئرمین سینیٹ پارے کہ پاکستان پاک چین اقتصادی راہداری ڈٹ انا وخت آ پوروی کن سنبرینگوک ءِ، حکومت پاکستان اٹی چینی شاری تا رکھ اکن غٹ گام گیج کننگ ءِ۔ چینی سفیر نونگ رونگ پارے کہ پاکستان چین نا خڑکی سنگت ءِ، چین ہڑتوم آ کنڈآتا کمکاری پین سوگو کننگ نا خواہندار ءِ، چین نا آزموندہ پاکستان نا راجی و زرگزرانی شونہالی ٹی کمکار مریک، چین نا وتواجہی و علاقائی سالمیت کن مخ تفی ءِ برجاتخنگ نا عزم نا درشانی ءِ کینہ۔ چیئرمین سینیٹ پارے کہ پاکستان ءِ تائیوان نا حالیت آتیا گڑتی ءِ، تائیوان نا ویل سنگین مننگ نا دروشم اٹ علاقائی امن و سوگوی بھاز زہمی مننگ ناخطرہ ءِ، یوکرین و دنیا نا ایلو ڈیہہ تیٹی برجا جھیڑہ غاتیان پد دنیا اسہ پین تنکی سے  سگنگ کپک، پوسکن آ جھیڑہ اگہ ودی مریک تو اونا جہانی امن، سلامتی و زرگزران آ منفی اثر تمک۔ چینی سفیر پارے کہ چین علاقائی امن کن تینا جہد ءِ برجاتخک۔