وزیراعظم محمد شہباز شریف نا اقلیت آتا قومی دے انا وخت آ کلہو

اسلام آباد۔ 11 اگست (اے پی پی) وزیراعظم محمد شہباز شریف اقلیت آتا خیرخواہی، قومی شونداری نا جہد اٹی اوفتا پورو اوار مننگ کن کوشست آتے برجاتخنگ و وسیلہ غاتے کاریم اٹ اتنگ نا حکومت نا عزم انا درشانی ءِ کرسا پارینے کہ پاکستان بیدس ذات وپات، رنگ و نسل و مذہب نا پرخ آن ننا غٹ انا ءِ، و ننے اواری اٹ  دانا شونداری و شونہالی کن جہدءِ برجاتخوئی مریک۔ اوداخیال آتا درشانی ءِ اقلیت آتا قومی دے انا وخت آ تینا کلہو اٹی کرے۔ اوپارے کہ ہرسال پاکستان نا شونداری و شونہالی ٹی اقلیت آتا کڑد ءِ خراج تحسین پیش کننگ، اوفتا ننا عظم قوم انا المی بشخ اس مننگ و مذہبی اقلیت آتا شرف نا عزم انا درشانی ءِ کننگ کن 11 اگست آ ’’قومی اقلیتی دے‘‘ انا وڑاٹ اڈتننگک۔ اونا پاننگ ئسک کہ اسلام امن و رواداری نا مذہب ءِ، قرآن پاک نا رداٹ دین انا باندات اٹی ہچ ءُ جبر اس اف، دا قرآنی پرمان سنت نبوی تون اواری اٹ دا اصول نا بنداو فراوان کیک ہرا قائد اعظم محمد علی جناح 11 اگست 1948 آ قوم آن تینا تران اٹی بیان کریسس۔ وزیراعظم پارے کہ ننا آئین اٹی مذہب نا آجوئی و اقلیت آتا بندغ و ملکیت آتا تکریم ءِ باقاعدہ کانودی دروشم تننگانے، حکومت ءِ نئے بیرہ دا زمواری تا جوانی اٹ درک ءِ بلکن دا مسخت آتا دوئی کننگ کن تینا عزم انا آخبتی یات دہانی نا وڑاٹ حکومت 11 اگست آ سرکاری کہول آ شاندار وڑاٹ قومی اقلیتی دے ءِ اڈتننگ  نا فیصلہ کرینے۔ اوپارے کہ ہمو سوب آتا چٹفنگ و خامی تا اصلاح ءِ کننگ ہرا راجی و مذہبی استحصال نا سوب جوڑ مننگ کیرہ ننا حکومت نا پالیسی تا بنداوی تمبہ ءِ، راجی و اقتصادی خلیج ءِ پورو کننگ و اقلیت آتیکن تعلیمی ادارہ و نمان خذمت آتا فراوانی کن نمائندہ فورم تیا خصوصی کوٹہ اس جتا کننگ کون آ گام گیج آتیان قومی کہول آ ہراسٹ ءِ اسہ وڑ تعلیم و شونداری نا وارخواہی نا فراوان یءِ پک کننگ نا کوشست کننگانے، داکان بیدس اقلیت آتا زرگزرانی وڑاٹ نزور تپہ غاتا حق انا پک کننگ ءِ رکھ و شونداری کن وقف مالی امداد ہم دا گام گیج آتا بشخ اسے۔ وزیراعظم پارے کہ ای اقلیت آتا گچینی و قومی شونداری نا کوشست و جہد اٹی اوفتا پورو اواری کن تینا کوشست آتے برجاتخنگ، وسیلہ غاتے کاریم اٹ اتنگ و اوفتے پین ودفنگ نا حکومت نا عزم انا درشانی ءِ کیوہ۔ اوپارے کہ ای دا وخت آ غٹ اقلیتی برادری تیان ہم خواست کیوہ کہ او رواداری و تین پہ تینی اتفاق نا فضاءِ مون آدننگ کن تینا کڑد ءِ ادا کرسا کیر انتئے کہ ننا راج اٹ ہندا اسٹ انگا کسر ءِ ہرا جہانی ہم گرنچی و امن ءِ مون آ دننگ نا ننا اسیجائی مسخت آتا دوئی کننگ نا سوب مریک۔ اونا پاننگ ئس کہ پاکستان بیدس ذات و پات، رنگ و نسل و مذہب نا پرخ آن ننا غٹ انا ءِ و ننے غٹ اواری اٹ دانا شونداری و شونہالی کن تینا جہد ءِ برجاتخوئی ءِ۔