بلوچستان اٹی طوفانی پِر، چندی بندغ آک زوال، ہزار آ ہندآک تمار

کوئٹہ۔ 25 جولائی (اے پی پی) پی ڈی ایم اے نا ترجمان پارینے کہ بلوچستان اٹی طوفانی پِر تیان پد بروک آ نوکاپ نا سوب آن ہزار آ ہندآک تمانو و مرک آتا کچ 102 اسکان سرمسنے۔ سرجم حوال آتا رداٹ پی ڈی ایم اے نا ترجمان نا پاننگ ءِ کہ ساڑی آ پِر تیان مسہ نیم ہزار ہند تمانو، 550 کلومیٹر آ 9 شاہراہ بھس مسنو وخت اس کہ 9 پول، 21 ٹیوب ویل و 16 ڈیم ہنانو چٹانو۔ ترجمان پارے کہ اسہ لکھ 97 ہزار 930 ایکڑ کشاری ڈغار ءِ نسخان رسینگانے وخت اس کہ مچ آ صوبہ ٹی 78910طالب علم آتا تعلیم ہم زہمی مسنے۔ اوپارے کہ کہوک آتیٹی 32 چنا و 28 زالبول اوار ءُ ولے مرک آتا کچ اٹی ودکی نا گڑتی ءِ۔ ترجمان پی ڈی ایم اے پارے کہ مچ آ بلوچستان اٹی دفعہ 144 نافذ کرسا 20 ضلع غاتے آفت زدہ گوندنگانے۔ اومستی پارے کہ صوبائی حکومت زہمی تے 1 لکھ روپئی امداد تننگ نا پڑو و بنجاغان 50 ارب روپئی نا خواست کرینے۔