اسلام آباد۔ 22 جولائی (اے پی پی) چیئرمین سینیٹ محمد صادق سنجرانی تون پاکستان اٹی ترکیہ نا پوسکن تعینات مروک آ سفیر پروفیسر ڈاکٹر مہمت پاچاجی پارلیمنٹ ہاؤس اٹی اوڑدہی کرے، اوڑدہی ٹی چیئرمین سینیٹ بطور سفیر تقرری آ مہمت پاچا جی ءِ مبارکبادی تس۔ چیئرمین سینیٹ محمد صادق سنجرانی پاکستان تون تعلقداری تا مون آ دننگ اٹ گچین کڑد ادا کننگ کن نیک است خواہی نا درشانی ءِ ہم کرے، پاکستان و ترکیہ نا برادرانہ تعلقداری تین پہ تینی پت و افہام و تفہیم آ ٹو، اوڑدہی ٹی ہڑتوم آ کنڈآتا تعلقداری و تین پہ تینی است خواہی نا امور آ گپ وتران کننگا، چیئرمین سینیٹ اومیت نا درشانی ءِ کرے کہ واپار و زرکاری نا بشخ آتیٹی ہڑتوم آ کنڈآتا کمکاری پین سوگو مریک۔ صادق سنجرانی جموں و کشمیر نا جھیڑہ غا ترکیہ نا کنڈآن پاکستان نا آخبتی مخ تفی آ منت واری ءِ ہرفے و پارے کہ اسلاموفوبیا نا خطرہ تون مون تننگ کن کوشست آتے ترند کننگ نا گرج ءِ۔ اوپارے کہ غٹ اسلامی ملک آتے اسلاموفوبیا نا برخلاف یکجا مرسا ہر فورم آ توار بڑزکروئی مریک۔ صادق سنجرانی دااومیت نا درشانی ءِ کرے کہ ترکیہ نا کنڈآن پاکستان ءِ کم و ود 261ٹیرف لائن تیا رعایت تننگ نا بابت باندات زوت طے مریک، ہڑتوم آ ملک آتا نیام اٹ ادارہ جاتی کمکاری اسہ ایلو نا آزموندہ غاتیان فائدہ ہرفنگ اٹ کمکار مریک۔ اوپارے کہ پارلیمانی سفارتکاری نا کمک اٹ ڈل آتا ہن و بر اٹی ترندی اتنگ وخت انا اہم ءُ گرج اسے۔ چیئرمین سینیٹ ہڑتوم آ ملک آتا نیام اٹ پارلیمانی ڈل آتا ہن و براٹی ترندی اتنگ نا اہمیت ءِ تالان کرے۔ اوڑدہی ٹی پاکستان و ترکیہ نا نیام اٹ تین پہ تینی است خواہی نا غٹ بشخ آتیٹی کمکاری ءِ پین سوگو کننگ نا است خواہی نا درشانی ءِ کننگا۔ چیئرمین سینیٹ و ترکیہ نا سفیر اوڑدہی ٹی چندی علاقائی و جہانی امور آ ہڑتوم آ ایلم ملک آتا اسہ وڑ موقف آ است جمی نا درشانی ءِ کرے وپارے کہ پاکستان وترکیہ نا سفارتی تعلقداری تا 75 می سال دے ءِ جوان وڑاٹ اڈتننگک۔ اوواپار، دودوربیدگ و دفاع نا بشخ آتیٹی کمکاری ءِ ودفنگ نا گرج آ زور شاغا و ہڑتوم آ کنڈآتا تعلقداری تے پین گچین کننگ، چندی علاقائی و جہانی فورم تیا اسہ ایلو نا مخ تفی نا عزم انا درشانی ءِ کرے۔ ترک سفیر پارے کہ او پاکستان تون ہڑتوم آ کنڈآتا و چندی بشخ آتیٹی تعلقداری تے پین ودفنگ کن تینا پبی کڑد ءِ ادا کیک۔ ترک سفیر علاقائی سوگوی کن پاکستان نا کڑد انا ستاءِ کرے و پاکستان تون ہر کہول آ سفارتی کمکاری ٹی پین ودفنگ نا عزم انا درشانی ءِ کرے۔
