محرام الحرام اٹی بین المسالک ہم آہنگی نا بارواٹ دیوان، انتظامی باندات آتیا سلابت کننگا

اسلام آباد۔ 22 جولائی (اے پی پی) ڈپٹی کمشنر اسلام آباد عرفان نواز میمن نا کماشی ٹی محرم الحرام اٹی بین المسالک ہم آہنگی نا بابت دیوان اس اڈ ہلک ، ہراٹی غٹ مسالک آتیان تعلق تخوک آ عالم دین تتون اوار ایس ایس پی، ایڈیشنل ڈپٹی کمشنر و ضلعی انتظامیہ نا آفیسر آک بشخ ہلکر۔ دیوان اٹی اسلام آباد اٹی مقدس تُو انا پورو ہم آہنگی، سیکورٹی و امن و ایمنی نا بابت انتظامی باندات آ سلابت کننگا۔ داوخت آ گپ وتران کرسا ڈپٹی کمشنر پارے کہ اسہ ایلو تون کمکاری آن محرم الحرام اٹی امن و ایمنی و تقدس بحال مننگ کیک۔ اوپارے کہ محرم الحرام اٹی ضابطہ اخلاق آ عمل کرسا بین المسالک ہم آہنگی نا درشانی ءِ کیر۔ اوپارے کہ اشتعال انگیز مقابلہ بازی آن پاناد کننگے۔ مجلس و جلوس اٹی بشخ ہلوک آک تخوک آ وخت و تروک آ روٹ آتا پابندی ءِ کیر۔ اوپارے کہ اسہ ایلو نا مذہبی جوزہ و فکرانا پاسداری ءِ کننگے۔ اوعالم دین تیا زور شاغا کہ تفرقہ بازی آن پاک راج اکن ہرفورم آ عالم دینک تینا کڑد ءِ ادا کیر۔ ڈپٹی کمشنر باور کرفینے کہ مخلوق نا جان و مال انا رکھ اکن ہرممکن گام گیج کننگک۔ اسوہ حسنہ و رغاموک آتیا عمل کرسا علاقہ ٹی امن و ایمنی ءِ برجا تخنگ آ امنا کننگا و عالم دینک تینا ہرممکن کمکاری نا باور کرفیر۔