اسلام آباد۔ 22 جولائی (اے پی پی) سلاہکار امور کشمیرو گلگت بلتستان قمر زمان کائرہ ثمینہ بیگ و اونا ٹیم ءِ دنیا نا ارٹمیکو بھلا ٹُل کے ٹو ءِ سرکننگ آمبارکبادی ترسا پارینے کہ ثمینہ بیگ پاکستان نا اولیکو زالبول کوہ پیما ءِ ہراکے ٹو ءِ سرکرینے۔ جاری بیان اٹی اوپارے کہ ثمینہ بیگ کے ٹو ءِ سرکرسا پاکستان نا پن ءِ مچ آ دنیا ٹی روشنا کرینے، پاکستانی زالبول آک زند انا غٹ بشخ آتیٹی بے مٹ کارکڑد نا درشانی ءِ کننگ ءُ۔ اوپارے کہ ہمت و عزم انا بابت ثمینہ بیگ و نائلہ پاکستان نا ایلو زالبول آتیکن اسہ درور اسے ءُ، کوہ پیمائی نا بابت مچ آ دنیا ٹی پاکستان نا پن ءِ روشنا کننگ اٹ گلگت بلتستان نا ورناتا اہم ءُ ہند اسے۔ قمر زمان کائرہ پارے کہ گلگت بلتستان نا گل زمین دنیا نا عظیم کوہ پیما ودی کرینے، دنیا ٹی پاکستان نا پن ءِ روشنا کننگ اٹ دا کوہ پیماک تینا جان تا نذرانہ اسکان پیش کرینو، مچ آ پاکستانی قوم گلگت بلتستان نا نرزور مار ومسن تے سلام پیش کیک۔
