اسلام آباد۔ 22 جولائی (اے پی پی) اسلام آباد اٹی ہندی حکومت آتا گچین کاری تا اڈتننگ نا بابت حلقہ بندی تا شیڈول نا رداٹ الیکشن کمیشن نا کنڈآن جوڑ کروک حلقہ بندی کمیٹی جمعہ نادے آ حلقہ بندی تا بنائی لڑ ءِ شینک کرینے۔ کمیشن نا کنڈآن جاری بیان نا رداٹ اسلام آباد اٹی 101 یونین کوسنل ٹہیفنگانے۔ ہر یونین کونسل اٹی 6 جنرل وارڈ و 2 زالبول نا وارڈ جوڑ کننگانے۔ بنائی حلقہ بندی تیا سلاہ و اعتراض 23 جولائی آن 7 اگست اسکان دائرکننگ مریک۔ ریجنل الیکشن کمشنر راولپنڈی ءِ حلقہ بندی اتھارٹی تعینات کننگانے ہرا سلاہ و اعتراض آتیا سماعت کیک، ہرانا دفتر 7/63سی، سیٹلائٹ ٹاؤن، ایران روڈ، چاندنی چوک، راولپنڈی ٹی واقع ءِ۔ حلقہ بندی اتھارٹی 22 اگست اسکان سلاہ و اعتراض آتے سرایتک۔ یونین کونسل و وارڈ انا حلقہ بندی نا گڈیکو لڑ 26 اگست 2022آ شینک کننگک۔ پین معلومداری کن درج ذیل نمبر آتیا حلقہ بندی اتھارٹی آفس 051-9290176، ڈسٹرکٹ الیکشن کمشنر آفس اسلام آباد 051-9261003آ رابطہ کننگ مریک۔
