لاہور۔ 22 جولائی (اے پی پی) گورنر پنجاب محمد بلیغ الرحمان کے ٹو مش ءِ سر کروک آ پاکستان نا اولیکو کوہ پیمازالبول ثمینہ بیگ ءِ مبارکبادی ترسا پارینے کہ پاکستانی زالبول آک ملک انا ہر بشخ اٹی تینا لائخی تے منفنگ ءُ، ثمینہ بیگ کون آ باصلاحات زالبول آ قوم گمر کیک۔ جمعہ نادے آ تینا اسہ بیان اسے ٹی گورنر پنجاب پارے کہ ہر راج انا شونداری کن زالبول آتا است بڈی و مون آ ہِننگ نا وارخواہی فراوان کننگ بھاز المی ءِ۔ اوپارے کہ مسلم لیگ ن نا حکومت مدام زالبول آتے واکدار کننگ کن عملی گام گیج کرینے۔ اوپارے کہ مسلم لیگ ن نا مسکوہی دور حکومت اٹی اولیکو زالبول نا یونیورسٹی جوڑ کننگا، اوکان پد پین زالبول آتا یونیورسٹی جوڑ کننگا تانکہ ہرا مسن تا لمہ و باوہ مخلوط تعلیمی ادارہ غاتیٹی تینا مسن تے تعلیم کننگ کن ہلیتورہ او ویمن یونیورسٹی تیٹی تینا مسن تے زیور تعلیم آن آراستہ مننگ کن ہلر۔ گورنر پنجاب مستی پارے کہ مسکوہی دور حکومت اٹ زالبول آتے واکدار کننگ کن ویمن ان ویلز نا پروجٹ نا بناءِ کننگا ہرانا دُوارہ گچین وڑاٹ بناءِ کننگانے۔
