اسلام آباد۔21جولائی (اے پی پی) بنجاہی کابینہ ءَ پولیس سروس آف پاکستان ءِ ریٹائرڈ آفیسر آفتاب سلطان ءَ را راجی احتساب بیورو ءِ چیئرمین جوڑ کنگ ءِ منظوری داتگ۔ افغان ٹرانزٹ ٹریڈ کیلئے ملٹی ماڈل ایئر روڈ کوریڈور ءِ ہم منظوری داتگ وہدے کہ کابینہ ءَ یوریا ءِ یک ٹن درآمد 100 ڈالر ء ُ گندم ءِ 36 ڈالر یک ٹن کم نیاد ءِ سرءَ ٹینڈر ءِ عمل ءَ را زوتاں چہ زوت گیش ء ُ گیوار کنگ ءَ دوئیں وزارت ساڑاتگ اَنت۔ پنچ شمبےءِ روچءَ مزن وزیر کارگس ءِ میڈیا ونگ ءَ چہ جاری بیان ءِ ردءَ مزن وزیر محمد شہباز شریف ءِ سروکی ءَ بنجاہی کابینہ ءِ دیوان بوتگ۔ مزن وزیر ءَ لاہور ءَ چہ ویڈیو لنک ءِ وسیلگ ءَ دیوان ءِ سروکی کتگ۔ مزن وزیر ءَ درائیں کابینہ باسکاناں وش اَتک کتگ۔ بنجاہی وزیر مفتاح اسماعیل ءَ بنجاہی کابینہ ءَ را امریکی ڈالرز ءِ ریٹ ءِ تہا گیشی ءِ ہوالگءَ شونست داتگ۔ بنجاہی وزیر ءَ دیوان ءَ را ھال داتگ کہ امریکی ڈالر ءِ نیادءَ را کم کنگء ُ پاکستانی کلدار ءِ ارزشت ءَ را محکم کنگءِ ھاترءَ درائیں گامگیج چست کنگ بوہگءَ اَنت۔ ایشی ءَ ابید بنجاہی کابینہ ءَ پولیس سروس آف پاکستان ءِ ریٹائرڈ آفیسر آفتاب سلطان ءَ را راجی احتساب بیورو ءِ چیئرمین جوڑ کنگءِ منظوری داتگ۔ ایشی ءَ ابید ترکی ءِ نیمگ ءَ چہ پاکستان ءَ را 261 ٹیرف لائنز ءِسرءَ رعایت دئیگ بیت کہ آئی ءِ تہا 123 چیزآنی سرءَ زیرو ریٹنگ ہم ہوار اِنت وہدے کہ پاکستان ءِ نیمگ ءَ چہ ترکی ءَ را 130 ٹیرف لائنز ءِسرءَ رعایت دیئگ ءِ گپ کتگ۔ اے چیزآنی تہا 8 مزنیں پڑآنی مصنوعات کہ آیانی تہا کشتء ُ کشاری، کیمیکل، پوست، پلاسٹک، ربڑ، انجینئرنگ ء ُ دھاتی صنعت آنی مصنوعات ہوار اَنت۔ من ء ُ گر ء َ چہ پاکستان ء ُ ترکی ءِ نیام ءَ دونیمگی بیپاری ءِ حم گیش بوتگ ء ُ 5 ارب ڈالر ءَ سربوتگ۔ مزن وزیر ءَ اے من ء ُ گرءِ ہوالگءَ بیپاری وزارت ءِ کوشستاناں ساڑاتگ۔
