اسلام آباد۔ 21 جولائی (اے پی پی) بنجائی وزیر سائنس و ٹیکنالوجی آغا حسن بلوچ تون اسلامی جمہوریہ ایران نا سفیر سید محمد علی حسینی پنچ شنبے نادے آ اوڑدہی کرے۔ وزارت سائنس و ٹیکنالوجی نا کنڈآن جاری بیان نا رداٹ سائنٹفک ایڈوائزرزین العابدین تون اوار وزارت نا سینئر کمامدارآک ہم داوخت آ ساڑی ئسر۔ بنجائی وزیرسائنس اینڈ ٹیکنالوجی ایرانی ڈل ءِ بخیر کرے و ہڑتوم آ ملک آتا نیام اٹ عقیدہ و دودوربیدگی تعلقداری تیا مبنی دوستانہ و برادرانہ تعلقداری تے مون آ تخا۔ اوپارے کہ پاکستان مدام تینا ہمسایہ ملک اتون تینا برادرانہ تعلقداری تے بھاز اہمیت ایتک ہراوخت انا کسوٹی آ پورو سلیسنو ، دابھاز است جمی نا ہیت ءِ کہ ہڑتوم آکنڈآتا تعلقداری سیاسی، اقتصادی ، دفاعی و سلامتی نا بشخ آتیٹی بڑزکو کہول انا ہن و بر نا کمک اٹ ترندی اٹ مون آ ہِننگ ءِ۔ آغا حسن بلوچ پارے کہ ہڑتوم آ ملک آک اسیجائی فائدہ غاتا چندی بشخ آتیٹی اسہ ایلو نا آزموندہ غاتیان فائدہ ہرفنگ کیرہ۔ پاکستان و ایران ای سی او نا بانی باسک آتیٹی اوار ءِ و ای سی او سائنس فاؤنڈیشن وزارت سائنس و ٹیکنالوجی نا رداٹ کاریم کروک آ بین الحکومتی تنظیم ءِ۔ بنجائی وزیر پارے کہ ایران اولیکو ملک ءِ ہرا پاکستان نا ریاستءِ امنا کرینے۔ بنجائی وزیر پارے کہ ہڑتوم آ ملک آتا تاریخ و داسہ ادب اسٹ ءِ، نن ہڑتوم آ کشمیر آن ہلیس فلسطین اسکان چندی علاقہ غاتیٹی ہم گرنچی تخنہ، ڈیہہ ٹی دیرپا امن و سوگوی ءِ ہُننگ و ودوک آ اسلاموفوبیا نا برخلاف اسیجائی موقف اختیار کننگ نا تین پہ تینی است خواہی تخنہ۔ بنجائی وزیر آغاحسن بلوچ ہڑتوم آ ملک آتا نیام اٹ کمکاری نا بے پناہ وارخواہی تے مون آ تخا۔ اوپارے کہ پاکستان سائنس و ٹیکنالوجی نا میدان اٹ ایران نا مہارت ہیل کننگ کیک۔ و نن اسیجائی فائدہ غاتا چندی بشخ آتیٹی کمکاری ءِ ودفنگ نا سوگو ارادہ تخنہ۔ اسلامی جمہوریہ ایران نا سفیر سید محمد علی حسینی پارے کہ ہڑتوم آ ملک آتا نیام اٹ تاریخی، دودوربیدگی ، مذہبی، لسانی ، فنی رابطہ و اسیجائی ہڑتوم آ ملک آتا نیام اٹ سائنسی، تعلیمی و علمی تعلقداری تے ودفنگ کن جوان ءِ۔ اوپارے کہ تہران یونیورسٹی اسلام آباد اٹی ٹیکنالوجی/ آئی ٹی پارک اس جوڑ کننگ کن تیار ءِ۔ اوداہیت آ ہم زور شاغا کہ پکستان و ایرانی یونیورسٹی تا نیام اٹ مفاہمت نا یات داشت آتے ترند کننگے تانکہ ہن و بر ءِ مون آ دننگ مرے۔ ایرانی سفیر پارے کہ ایران و پاکستان نا نیام اٹ نہہ سد کلو میٹر نا سیم ءِ و ہڑتوم آ ملک آتے اسہ ایلو ءِ سوگو کننگ کن داڑآن بایدے فائدہ ہرفر انتئے کہ ہڑتوم آ ملک آتا نیام اٹ توانائی، واپار و سائنس نا بشخ آتیٹی بھلو کمکاری اسے نا گمان ساڑی ءِ۔ بنجائی وزیر سائنس و ٹیکنالوجی نا بشخ اٹی است خواہی پاش کننگ اٹ ساڑی حکومت نا کوشست آتا ستاءِ کرے۔ بنجائی وزیر پارے کہ ہڑتوم آ ملک آتا کوشست مرے کہ پاکستان ایران نا مرغن بارڈر ہرا پاکستان نا صوبہ بلوچستان و ایران نا سیستاں بلوچستان ءِ لگک آن واپار نا مون آ دننگ ءِ سوگوی ایتر، بارڈر آ گیٹ جوڑ کننگے ہراڑآن تفتان، تربت، بلید و پنجگور نا علاقہ غاتیٹی واپار آن اقتصادیات ءِ مون آ دننگ رسینگک۔ ایرانی سفیر بنجائی وزیر سائنس و ٹیکنالوجی نا منت واری ءِ ہرفے و اودے ایران نا دورہ نا سلہ خلک۔
