اسلام آباد۔ 21 جولائی (اے پی پی) بنجائی وزیر آبی وسیلہ سید خورشید احمد شاہ پارینے کہ دیر انا بچت ، کشاری بشخ انا شونداری و ودوک آ آبادی نا گرج آتے پورو کننگ کن آبی کوڑی تا تفنگ آ چکار نا گرج ءِ، کشاری پیدوار اٹی ودکی آن پاکستان وام ہلوک آ ملک انا جاگہ غا وام تروک ءُ ملک اس جوڑ مننگ کیک، دیر انا انصاف اٹ بشخنگ کن ٹیلی میٹری سسٹم نا خلنگ آ کاریم مننگ ءِ ، چاگڑد نا رکھ و درخت آتا گڈنگ ءِ توننگ کن گچین کانود بایدے جوڑ کننگے، پاکستان کون آ کشاری ملک خولم و ایلو کشاری مصنوعات آتا درآمد آ نہادی زرمبادلہ خڑچ کننگ نا متحمل مننگ کپک۔ اوداخیال آتا درشانی ءِ پنچ شنبے نادے آ داڑے قومی آبی پالیسی 2018 آ عملدرآمد نا بابت ورکشاپ آن تران کرسا کرے، داوخت آ سیکرٹری آبی وسیلہ ڈاکٹر کاظم نیاز، چیئرمین فیڈرل فلڈ کمیشن احمد کمال، چیئرمین واپڈا ، چیئرمین ارسا و ایلو تعلقدار وزارت و ادارہ غاتا آفیسر و ملکی و درملکی آبی چاہندار آک ہم ساڑی ئسر۔ سید خورشید احمد شاہ پارے کہ دیر بنداوی انسانی گرج ءِ ، بدبختی اٹ مستین اٹ دانا اہمیت نا احساس ءِ کننگتو و بھلاڈیم و آبی کوڑی تا تفنگ آ کاریم کننگتو، نئے ڈغار اٹی دیر انا کچ آ چکار کننگا۔ اوپارے کہ سندھ و خیبرپختونخوا زیر زمین دیر انا بابت اتھارٹی جوڑ کرینو، ایلو صوبہ غاتے ہم دا اتھارٹی تے جوڑ کروئی مرے، دا وخت آ ملک انا غٹ آن بھلو ویل آبادی نا ءِ و ملکی آبادی 24 کروڑ اسکان سرمسنے ہرا 10 سال پد 30 کروڑ اسکان سرمریک، ننے کشاری بشخ انا شونداری کن دیر انا گرج ءِ انتئے کہ ہراتم کشت وکشار کن دیر دوئی مفک تو ولدا ویل ودی مریک و ننے بنداوی کنوئی آ گڑاتے ہم درآمد کروئی تمک۔ دیر انا کاریم اٹ اتنگ و بچت کن مریس مد ڈٹ بندی و مخلوق اٹ شعور تالان کننگ نا گرج ءِ۔
