اسلام آباد۔ 21 جولائی (اے پی پی) بنجائی وزیر بجلی خرم دستگیر پارینے کہ چین آن 2 ارب30 کروڑ ڈالر نا مالی کمک رسینگانے پین دوست ملک آک ہم پاکستان نا کمک ءِ کیرہ، آئی ایم ایف آن ہم اگست اٹی قسط ملک، زوت کبینی ٹی کمتی مرسا نظر بریک، عمرانی فتنہ دروغ انا زی آ دروغ تڑنگ ءِ، ننا مقابلہ فاشٹ جماعت تون ءِ، ادارہ غاتا برخلاف بیان بازی کننگ انگ ءِ، عمران خان نا ایجنڈا قومی ادارہ غاتے بھس کننگ ءِ، جمہوری وڑاٹ اودے شکست ایتنہ، لس گچین کاری 2023 اٹی مریرہ، ساڑی حکومت مسہ تُو اٹی 214 ارب گردشی وام تے کم کرینے۔ داخیال آتا درشانی ءِ او پنچ شنبے نادے آ وزیر مملکت پیٹرولیم ڈاکٹر مصدق ملک تون پریس کانفرنس کرسا کرے۔ خرم دستگیر خان پارے کہ ساڑی حکومت تینا مد ءِ پورو کیک، 2018 ء نا گچین کاری تیٹی ہم پنجاب اٹی ننا گیشتری ئس و ننا باسک آتا کچ 166 و عمرانی فتنہ نا کچ 155 ئسک۔ اوپارے کہ 17 جولائی آ مسلم لیگ ن پنجاب اٹی ضمنی گچین کاری اڈتس و اوٹی ہچ ءُ جنگ و جھیڑہ اس متو، نئے پریزائیڈنگ آفیسر اس و نئے وونٹ بکس اس دُزی مس، پرامن وڑاٹ گچین کاری تے اڈتننگا۔ اوپارے کہ داسہ ہم عمرانی فتنہ دروغ انا زی آ دروغ تڑنگ ءِ کہ داوڑ مس ایوڑ مس، ای اوفتے پاننگ خواوہ کہ دروغ ءِ ہلبو و دا ملک انا گچینی کن گام ہرفبو۔ اوپارے کہ ننا مقابلہ فاشٹ جماعت تون ءِ و اوفتا ہر اسہ دروغ ءِ نن بے سہب کینہ۔ اوپارے کہ ادارہ غاتا برخلاف بیان بازی آن اوفتے شست کننگ انگ ءِ۔
