اقوام متحدہ۔ 21 جولائی (اے پی پی) پاکستان اقوام متحدہ غان خواست کرینے کہ افریقہ ٹی اقوام متحدہ نا پائیدار شونداری نا 2030 نا ایجنڈا ءِ مون آ دننگ نا گرج ءِ ، ہرانا مسخت بھاز نیزگاری نا چٹفنگ، بے بریبری ٹی کمتی کننگ و کرہ ارض انا رکھ ءِ کننگ ءِ۔ اقوام متحدہ ٹی پاکستان نا آخبتی مندوب منیر اکرم تدوک آ دے افریقہ نا بابت بڑزکو کہول انا دیوان اٹی گپ وتران کرسا پارے کہ کورونا دین انا سوب آن بیرہ افریقہ ٹی 43 لکھ بندغ بھاز نیزگار مسنو و دا دین مچ آ دنیا نا زرگزران تے بھس کرے و ملازمت آتے خطرہ ٹی شاغا و داسہ جہانی خور ، ایندھن و مالیات نا ہلہلہ ئی حالیت آتا سوب جامع و پائیدار بحالی نا کوشست آتیٹی اڑاند ودی مسنے وخت اس کہ موسمیاتی بدلی دا چیلنج آتیٹی پین ودکی نا سوب ءِ۔ اوپارے کہ افریقہ دنیا نا غٹ آن زیات بے رکھ ڈیہہ ءِ، ہراڑے کیہی ملک آک نوکاپ، خشک سالی و ترند باسنی تون اوار کیہی آفت آتون مون تننگ ءُ۔ اوپارے کہ گلاسکو ٹی چاگڑدی بدلی نا توننگ نا بابت مروک آ کانفرنس کوپ 27 اٹی چاگڑد نا بابت کروک آ قول آتے عملی ءُ دروشم اس بایدے تننگے و معاہدہ غاتیا عملدرآمد کننگے۔ اوزور شاغا کہ چاگڑدی بدلی تون مون تننگ کن شون ہلوک ملک آک سالانہ کلائمیٹ فنانس اٹی 100 بلین امریکی ڈالر نا قول ءِ پورو کیرہرااوفتا ساڑی سرکاری شونداری امداد (او ڈی اے) آن جتا و ودکی مرے۔ اوپارے کہ دا زر پائیدار شونداری نا متحرک ماڈل آتیٹی بدلی نا چیلنج آتا مقابلہ ءِ کننگ کن گنج اس مفک۔
