اسلام آباد۔ 21 جولائی (اے پی پی) بنجائی وزیر خزانہ مفتاح اسماعیل پارینے کہ پام آئل اڑزآن مننگ نا سوب آن سی و کنوئی آ تیل انا نہاد آتیٹی کمتی بسنے ، ارٹ میکو و مسٹ میکو درجہ نا سی و تیل اڑزآن مسنو، وخت اس کہ درجہ اول نا نہاد آک ہم زوت کم مریرہ۔ پنچ شنبے نادے آ بنجائی وزیر خزانہ پارے کہ درآمد آتیٹی کمتی نا پالیسی نا نتیجہ ٹی ہندا تُو امپورٹ بل اٹی 2.5 ارب ڈالر زرمبادلہ نا بچت مسنے وخت اس کہ جون اٹی 7.4 ارب ڈالر نا مقابلہ ٹی جولائی نا تُو اٹی 5 ارب ڈالر مریک۔ اوپارے کہ حکومت یوریا کھد انا سمگلنگ ءِ توننگ کن اولیتی بنداو تیا گام گیج کرینے و یوریا نا آسان و کم نہاد آ دستیابی کن 2 لکھ ٹن یوریا امپورٹ کننگ نا منظوری ءِ تسنے۔ اوپارے کہ آئی ایم ایف تون معاہدہ مسنے، بورڈ اپرووول اتون اوار اوار ایشیئن ڈویلپمنٹ بینک و ورلڈ بینک آن ہم فنانسنگ ملنگ والا ءِ۔ اوپارے کہ پاکستان اٹی لس وڑاٹ ڈیزل 7 آن 8 دے انا سٹاک ساڑی مریک ولے اللہ نا فضل اٹ داوخت آ ملک اٹی 60 دے انا ڈیزل ساڑی مننگ آن بروک آ دے تیٹی فیول امپورٹ بل اٹی کمتی گمانی ءِ۔ اوپارے کہ حکومت 5 لکھ ٹن خولم نا ہلکونے، و پین 3 لکھ ٹن خولم ہلنگ نا منظوری ءِ تسنے۔ دا چرجوئی ٹی روس آن حکومتی کہول آ خولم نا ہلنگ کن گپ وتران برجاءِ ۔
